Пракаціцца на Love-мабіле і падарыць букет - але не з кветак! Сёння ва ўсіх закаханых свята. Традыцыя адзначаць Дзень кахання з'явілася яшчэ ў Старажытным Рыме, але і сёння 14 Лютага застаецца самым рамантычным святам у годзе. Небывалы для аўторка ажыятаж сёння пануе не толькі ў кветкавых магазінах, рэстаранах, але і ў ЗАГСах. Спіс самых крэатыўных падарункаў і кранальных гісторый кахання - у Надзеі Сербіненкі.
Звычайна аўторак для сталічных ЗАГСаў - спакойны дзень. Але не сёння, 14 лютага 2017 года: гэтую дату маладыя Павел і Кацярына ўжо запісалі на старонкі сваёй сямейнай гісторыі.
Самую рамантычную пару ў Гомелі сёння шукалі анёлы. На вуліцах горада некаторым закаханым атрымалася не толькі ўбачыць іх у загадкавым Love-мабіле, але і атрымаць падарункі - паветраныя шары ў выглядзе сэрцаў, вячэру ў рэстаране і нават наведванне спа-салона.
У Мінску правесці рамантычны вечар можна не толькі ў рэстаране. Квеструмы, тэатры, каткі і нават музеі сёння адкрытыя дапазна.
У музеі архітэктурных мініяцюр спецыяльна да Дня закаханых распрацавалі рамантычную экскурсію. Тут кожны макет - гэта месца любоўных драм і хэпі-эндаў. Напрыклад, каля Нясвіжскага замка экскурсавод распавядзе аб трагічным каханні Барбары Радзівіл і Жыгімонта Аўгуста.
Галоўны сімвал свята ўсіх закаханых - валянцінка. Сучасныя майстры ўвасабляюць сэрцы ў шкле, дрэве, шакаладзе. Так, кандытар Кацярына Варганава распрацавала эксклюзіўную калекцыю імбірных пернікаў для самых каханых.
