Сёлета парламенцкая восень супала і з правядзеннем прэзідэнцкіх выбараў. Парламентарыям спікеры дзвюх палат нагадалі, што зараз вельмі важна захаваць адзінства народа і ўлады, а таксама гатоўнасць разам працаваць на агульную карысць. Першы рабочы дзень дэпутатаў у рэпартажы Андрэя Лапцёнка.
Як гэта і было раней, адным з галоўных пунктаў парадку дня ўсёй восеньскай сесіі стане зацвярджэнне асноўнага фінансавага закона краіны - бюджэту на 2016 год. Як заявіў напярэдадні спікер Палаты прадстаўнікоў Нацыянальнага сходу Уладзімір Андрэйчанка, задача - захаваць сацыяльную скіраванасць бюджэту і стварыць эфектыўныя стымулы для развіцця эканомікі. Зрэшты, пры фарміраванні бюджэту будуць прымяняцца і новыя падыходы.
Новы падыход задае і цяперашні палітычны сезон. Атмасфера радаснага ажыўлення хутка змяняецца дзелавой. Традыцыйнае выступленне старшыні ніжняй палаты было незацягнутым. Важнае ў звароце да дэпутатаў: трэба захаваць адзінства народа і ўлады, гатоўнасць разам працаваць на агульную карысць. Сімвалічна, што адным з першых разглядаецца законапраект "Аб дзяржаўна-прыватным партнёрстве".
Падтрымка сродкаў небюджэтных крыніц сёння можа насіць прарыўны характар для народнай гаспадаркі, будучы закон дазваляе рэалізоўваць важныя сацыяльныя праекты з дапамогай інавацый, капіталу і рэсурсаў прыватнага бізнесу, не нагружаючы бюджэт.
Еўрапейскі банк рэканструкцыі і развіцця, Сусветны банк, Міжнародная фінансавая карпарацыя ўжо заявілі аб гатоўнасці аказаць садзейнічанне ўраду Беларусі ў падрыхтоўцы такіх праектаў. Трэба сказаць, міжнародную актыўнасць Беларусі сёння таксама актыўна абмяркоўвалі і нават ратыфікавалі вялікі блок пагадненняў, сярод якіх пагадненні з Кітаем, Тайландам, Індыяй, Пакістанам і іншымі дзяржавамі.
Мабілізаваць усе нацыянальныя сілы і рэсурсы заклікаў сенатараў і спікер верхняй палаты парламента Міхаіл Мясніковіч. Толькі так, паводле яго слоў, адкрытая свету беларуская эканоміка зможа адысці ад знешніх шокаў і выйсці на шлях дынамічнага развіцця. Усяго на парадку дня дзясятай сесіі Савета Рэспублікі каля 40 законапраектаў: прамысловая бяспека, судаводства, дакументы ў рамках Саюзнай дзяржавы і Еўразійскага эканамічнага саюза. Традыцыйна вялікі блок сацыяльных пытанняў.
У пошуках адзіна правільнага рашэння і ў якасці прыкладу кансалідацыі і скаардынаванай палітыкі дэпутаты далі згоду на сумесныя пасяджэнні ніжняй і верхняй палат беларускага парламента. Чакаецца, што ў такім фармаце будуць прымацца рашэнні па найбольш важных пытаннях восеньскай сесіі. Астатак дня дэпутаты абедзвюх палат прысвяцілі абмеркаванню бягучых пытанняў сённяшняга парадку дня.
