Яго не стала 38 гадоў таму. Многае было звязана ў Высоцкага з Беларуссю. Яго дзед жыў у Брэсце. Сам акцёр неаднаразова здымаўся ў карцінах "Беларусьфільма". Так, Высоцкі некалькі тыдняў правёў у наваколлях Навагрудка на здымках фільма "Сыны ідуць у бой".
Пра лета 69-га - у рэпартажы Алены Борматавай. Гарадская гасцініца Навагрудка. Менавіта тут у жніўні 69-га на некалькі дзён спыняўся Уладзімір Высоцкі з Марынай Уладзі. Па сутнасці, вядомыя акцёры праводзілі ў Беларусі свой мядовы месяц. Адзіны ў савецкай гасцініцы нумар люкс. Двухпакаёвы з ваннай. Сёння – мемарыяльны. Але спыніцца ў ім можа любы. Побач у скверы, які зараз носіць імя Высоцкага, акцёр выступаў перад мясцовымі жыхарамі. Такі опэн-эйр шасцідзясятых.
Прыходзіў ён і на раскопкі ў замак. У Навагрудак Высоцкі прыехаў да свайго сябра - рэжысёра Віктара Турава. Той як раз здымаў у наваколлях фільм "Сыны ідуць у бой".
На пляцоўцы ў вёсцы Літоўка перад пачаткам здымак Высоцкі даў канцэрт здымачнай групе на беразе возера.
Высоцкі спыняецца ў Літоўцы на некалькі дзён. Тым больш што ў Беларусь прыехаў не працаваць, а адпачываць. Незадоўга да гэтага акцёр перажыў клінічную смерць. І гэта ў 31 год. У хаце, куды яны звярнуліся, месца не знайшлося. Гаспадыня параіла ім зайсці да суседа насупраць.
Будынак, дзе некалькі дзён жыў Уладзімір Высоцкі з Марынай Уладзі. У хаце не знайшлося свабоднага пакоя, таму яны і пасяліліся ў гаспадарчай пабудове. І менавіта тут Высоцкі напісаў чатыры песні для фільма "Сыны ідуць у бой".
Тры песні ўвайшлі ў стужку. Адмыслова да тураўскага фільма Высоцкі піша "Ён не вярнуўся з бою".
Тут жа быў напісаны і самы лірычны верш "Тут лапы ў елак дрыжаць на ветры".
