З 28 сакавіка па 4 красавіка ў Беларусі праходзіць Тыдзень лесу - сёлета ён прысвечаны 70-й гадавіне Перамогі савецкага народа ў Вялікай Айчыннай вайне. Запрашаюцца ўсе, хто жадае дапамагчы. Поўны пералік аб'ектаў размешчаны на сайце Мінлясгаса. Сёння да акцыі далучыліся ўдзельнікі, прызёры і чэмпіёны Алімпійскіх гульняў.
Рэпартаж Станіслава Ліпскага. Першы віцэ-прэзідэнт Нацыянальнага алімпійскага камітэта Максім Рыжанкоў сёння ў першай палове дня практычна не паднімаў трубку: па-першае, не было часу, па-другое, у справе пасадкі саджанцаў трэба быць засяроджаным. У садоўніцтве толк ведае: на дачы вырошчвае яблыні і грушы, зусім нядаўна пасадзіў персік.
Спартыўная эліта краіны сёння далучылася да рэспубліканскай акцыі "Тыдзень лесу", прысвечанай 70-годдзю Перамогі ў Вялікай Айчыннай вайне. На двух гектарах Станькаўскага лясніцтва алімпійцы пасадзілі каля 9 тысяч саджанцаў елкі звычайнай.
Убачыць плён старанняў алімпійцаў можна будзе ўжо праз год, а праз 7 гадоў вышыня дрэў дасягне 10 метраў.
Практычная дапамога лесаводам, зразумела, не самамэта акцыі. Галоўнае - прыцягнуць увагу да лясных рэсурсаў. Па-першае, беларускі лес - гэта лёгкія Еўропы; па-другое, лес - гэта своеасаблівая эканамічная падушка для нашай краіны; а па-трэцяе, лес - гэта неад'емны фактар Перамогі. У гады Вялікай Айчыннай вайны 375 тысяч партызан ваявалі тут, каб сёння мы былі свабоднымі, 25 тысяч з іх былі дзецьмі.
Васіль Аляксеевіч Князеў - заслужаны трэнер СССР па валейболе - быў сярод іх. У 10 гадоў, пасля таго як расстралялі бацькоў, пайшоў у партызаны. Сын палка ўваходзіў у атрад Дзячкова - з 1971 года ўзначальвае "Батальён беларускіх юных арлянят". Вёску Станькава запомніў назаўжды.
У пары з Васілём Аляксеевічам працуе Святлана Парамыгіна - першая ў гісторыі нашай незалежнай краіны ўладальніца Вялікага хрустальнага глобуса па выніках сезона ў біятланістаў. Гаворыць: сёння ёй пашанцавала.
Летась у такой акцыі прынялі ўдзел каля 50 тысяч чалавек.
