А іх стварэнне павінна праходзіць больш эфектыўна і хутка. Наконт гэтага ішла размова сёння падчас рабочай паездкі па Гомельскай вобласці. На гэта ўрад і Нацбанк накіраваў Прэзідэнт і ў штогадовым Пасланні народу і парламенту.
Так, прамысловай галіне, каб займаць годную пазіцыю на канкурэнтным сусветным рынку, неабходна браць курс на інавацыі. А гэта і годная зарплата, і якасна новы ўзровень. У цэлым рынак працы павінен быць гібкім, а магчымасць знайсці працу са стабільным заробкам павінна быць у кожнага беларуса ў любым рэгіёне краіны. Дарэчы, у сферы занятасці спецыялісты адзначаюць пазітыўныя тэндэнцыі: узровень беспрацоўя скарачаецца, з'яўляюцца новыя рабочыя месцы. Пра сферу нацыянальных інтарэсаў раскажа Надзея Сербіненка.
Тры тысячы рабочых прапаноў ад сотні арганізацый Мінска. Агульнагарадскі кірмаш вакансій праходзіць раз на паўгода і заўсёды з ажыятажам. На адной пляцоўцы як прамысловыя гіганты (работнікаў шукаюць МАЗ, МТЗ), так і невялікія прыватныя фірмы.
Спецыялісты ў сферы працаўладкавання адзначаюць рост попыту на рабочую сілу, скарачэнне цякучасці кадраў і зніжэнне беспрацоўя. Зараз у Мінску адкрыта каля 12-ці тысяч вакансій. Гэта амаль на 40 % больш, чым летась. Знайсці працу аб'ектыўна стала прасцей. У сярэднім на аднаго беспрацоўнага прыпадае 6 вакансій.
Бухгалтараў, лагістаў, прадзільшчыкаў, цясляроў і не толькі ў Мінску навучаюць за сціснутыя тэрміны, каб чалавек максімальна хутка пачаў працаваць.
Атрымаць новую прафесію і стаць, напрыклад, вадзіцелем тралейбуса можна менш чым за паўгода. У тралейбусным парку 5 рыхтуюць спецыялістаў абсалютна бясплатна. І што важна - з гарантыяй працаўладкавання.
Так і Андрэй Папоў вырашыў ажыццявіць даўнюю мару і стаць вадзіцелем тралейбуса. Праз пяць месяцаў навучання - у штаце "Мінсктранса".
Плённае навучанне нюансам прафесіі наладжана і на заводзе "Радыёхваля" ў Гродне. Тут вырабляюць аўтамабільныя запчасткі: электражгуты, кампакт-генератары для канцэрна Volkswagen і не толькі. Прадпрыемства экспартна арыентаванае, заказаў больш чым дастаткова. Таму новыя кадры тут чакаюць і гатовыя іх навучаць.
Андрэй Сірчанка ўладкаваўся на прадпрыемства тры месяцы таму. Пра тое, што вытворчасці патрэбныя новыя спецыялісты, даведаўся на афіцыйным сайце кампаніі. Завабіў і сацыяльны пакет: прадпрыемства дае інтэрнат, а тонкасцям прафесіі можна навучыцца прама на рабочым месцы.
У Гродзенскай вобласці штогод ствараецца каля 5 тысяч рабочых месцаў.
А за плячамі ў гэтага прадпрыемства дзесяцігоддзі стварэння высокатэхналагічнай навукаёмістай прадукцыі і 150 інавацыйных патэнтаў. Тут вырабляюць рэнтгенаўскае абсталяванне. Пульмасканы, мамографы, мабільныя дыягнастычныя комплексы запатрабаваныя не толькі ў Беларусі, але і за мяжой. На прадпрыемстве ствараюць так званыя высокатэхналагічныя рабочыя месцы. Сёлета прынялі на працу каля ста новых спецыялістаў. Прыкладна столькі ж возьмуць у наступным.
Наконт стварэння высокапрадукцыйных рабочых месцаў у тым ліку ў прамысловасці ў сваім Пасланні беларускаму народу і Нацыянальнаму сходу на тыдні гаварыў і Прэзідэнт. Аляксандр Лукашэнка запатрабаваў ад урада і мясцовых органаў улады адкрыцця ў краіне рабочых месцаў, арыентаваных на вытворчасць інавацыйнай, суперзапатрабаванай прадукцыі. А эфектыўнасць работніка павінна адлюстроўвацца таксама на даходах кампаніі ў цэлым.
Права на годную працу і стабільны заробак павінна быць у кожнага. І ў любым рэгіёне краіны. А чалавек мае права выбраць, дзе праявіць сябе: у сельскай гаспадарцы, медыцыне, будаўніцтве або IT-сферы. Галоўнае - каб праца была на радасць і прыносіла карысць.
