Нараджэнне Хрыстовае, адно з галоўных хрысціянскіх святаў, адзначаюць праваслаўныя вернікі ва ўсім свеце: Руская, Грузінская, Сербская, Балгарская, Канстанцінопальская і Іерусалімская праваслаўныя цэрквы, а таксама ўсе афонскія манастыры і стараверы.
Асабліва пышныя ўрачыстасці - нараджэнне Сына Божага - адзначаюць у Віфлееме - там, дзе нарадзіўся Ісус. Вернікі з усяго свету прыбылі на ўрачыстую службу, якую правёў кіраўнік Грэка-праваслаўнай царквы, Патрыярх Іерусаліма Феафіл III. Тысячы паломнікаў сабраліся ў базіліцы Раства.
Прадстаяцель Рускай праваслаўнай царквы - Патрыярх Маскоўскі і ўсяе Русі Кірыл - правёў службу ў галоўным храме Расіі. У кафедральным саборным храме Хрыста Збавіцеля сабраліся больш як 5 тысяч вернікаў.
Нараджэнне Хрыстовае сустрэлі і праваслаўныя Беларусі. Усяночнае дбанне прайшло больш чым у 1,5 тыс. прыходаў. Святочнае набажэнства ў Мінскім Свята-Духавым кафедральным саборы ўзначаліў мітрапаліт Мінскі і Заслаўскі, Патрыяршы Экзарх усяе Беларусі Павел.
З Раством праваслаўных хрысціянаў Беларусі павіншаваў Прэзідэнт Аляксандр Лукашэнка. А сёння, ужо па традыцыі, Кіраўнік дзяржавы прысутнічаў на калядным набажэнстве ў Свята-Духавым кафедральным саборы. З вялікім святам Аляксандра Лукашэнку павіншавалі выхаванцы нядзельнай школы. Прэзідэнт уручыў дзецям калядныя падарункі. А пасля Аляксандр Лукашэнка разам з мітрапалітам Паўлам запалілі калядную свечку ля цудатворнага абраза Мінскай Божай Маці. Паданне паведамляе, што абраз быў напісаны святым апосталам і евангелістам Лукой. Шматлікія стагоддзі абраз знаходзіўся ў Візантыі. Святыня перажыла нямала ліхалеццяў. Ёй пакланяліся людзі шматлікіх пакаленняў.
У цёплай абстаноўцы Аляксандр Лукашэнка пагутарыў з вернікамі. Прэзідэнт падвёў некаторыя вынікі мінулага года, нямала гаварыў аб укладанні царквы ва ўмацаванне міру і аб будучыні Беларусі.
З нагоды свята Аляксандр Лукашэнка і мітрапаліт Павел абмяняліся падарункамі. У дарунак Кіраўніку дзяржавы мітрапаліт паднёс абраз "Збавіцель". Уладар прывёз яго са святой зямлі - Іерусаліма. Ікона асвячоная на Гробе Гасподнім. Прэзідэнт перадаў у дарунак Беларускай праваслаўнай царкве абраз Нараджэння Хрыстовага, напісаны ва ўнікальнай тэхніцы - васковай тэмперы.
