Рэканструкцыя дарог, падтрымка прадпрыемстваў, сітуацыя з каранавірусам. Рабочая паездка Прэзідэнта ў Лідскі раён

Рэканструкцыя дарог, сітуацыя ў сельскай гаспадарцы, падтрымка прамысловых прадпрыемстваў і будучыня працоўных калектываў. Вельмі дзейснай і насычанай атрымалася сённяшняя камандзіроўка Прэзідэнта ў Лідскі раён. Гэта датычыцца і фармату, і закранутых тэм. Паводле традыцыі канец тыдня ў рабочым графіку Кіраўніка дзяржавы прысвечаны выязным мерапрыемствам. Прычын пабываць менавіта на Гродзеншчыне некалькі. Гэта рэканструкцыя дарогі М6 Мінск - Гродна -  граніца Польшчы (Брузгі) (участак Аляксандр Лукашэнка агледзеў з верталёта)  і візіт на шклозавод "Нёман". Размова пачалася прама на верталётнай пляцоўцы з агляду стану спраў ва ўсім рэгіёне. Гэта АПК, праца прамысловасці, будаўніцтва дарог. Абмеркавалі і сітуацыю з COVID-19 у маштабах краіны. 

Размова наконт сацыяльна-эканамічнай сітуацыі ў рэгіёне прадоўжылася і на пляцоўцы завода "Нёман". У тым ліку Кіраўніку дзяржавы паказалі ўсе этапы вытворчасці хрусталю і шклаваты. Выпуск апошняй, экспартна арыентаванай прадукцыі, удалося запусціць дзякуючы мадэрнізацыі. Зараз не толькі больш прадаюць за мяжу, але ў цэлым павысіўся імідж брэнда. Прадукцыя "Нёмана" ёсць у калекцыях многіх вядомых людзей. У якасці прэзентаў дорыць яе і Кіраўнік дзяржавы сваім замежным калегам. Для 10-тысячнай Бярозаўкі завод - горадаўтваральнае прадпрыемства, там працуе кожны пяты яе жыхар.

Падчас асабістай размовы з супрацоўнікамі прадпрыемства Прэзідэнт паабяцаў  адрасную падтрымку "Нёману", у тым ліку для пашырэння вытворчасці. Працягнулі, вядома, гутарку і на самыя актуальныя тэмы. Медыкі зараз ва ўсіх сэнсах галоўныя героі, і яны павінны быць забяспечаныя ўсім неабходным. Сапраўды, патрэбнасць у масках у медустаноў вялікая: штодня медыкам неабходна паўмільёна штук. Плюс праз пандэмію попыт расце і ў насельніцтва. Пытанне пад кантролем улад. Сёння шматлікія вытворчасці пераарыентаваліся. Зараз ахоўныя маскі шыюць каля сотні прадпрыемстваў.

Распавёў Кіраўнік дзяржавы і пра сваё бачанне, як трэба пачынаць навучальны працэс у краіне ўжо з панядзелка. Рабіць гэта трэба паступова, асабліва для буйных гарадоў, прыкладна тыдзень павінен сысці на тое, каб дзеці ўцягнуліся ў працэс. Нагадаем, з улікам эпідэміялагічнага становішча, якое складваецца ў краіне, школьныя канікулы ў Беларусі падаўжаліся двойчы - штораз на тыдзень.