Праект пастановы зараз разглядаюць у Міністэрстве транспарту і камунікацый. Свае аргументы ў прыхільнікаў і праціўнікаў новаўвядзення. Дарожная рамантыка, добрая магчымасць набыць неабходную дробязь прама ў дарозе або дакучлівыя прадаўцы і ніякай гарантыі якасці?
У пытанні разбіралася наш карэспандэнт Вікторыя Антоненкава. Пытанне забароны гандлю ў электрычках - вострае. Для прыняцця любога рашэння патрэбны важкія аргументы. Днямі пра гэта гаварылі на грамадска-кансультатыўным савеце пры Міністэрстве антыманапольнага рэгулявання і гандлю. Важна вызначыць, па якіх правілах дазволіць такую дзейнасць. Большасць прадаўцоў зарэгістравана як індывідуальныя прадпрымальнікі, а малому бізнесу зараз на ўсіх узроўнях зялёнае святло.
Віктар Маргелаў, сустаршыня Рэспубліканскай канфедэрацыі прадпрымальніцтва: "Ёсць людзі, якім трэба карміць сем'і, і яны знайшлі спосаб гэта рабіць. Напэўна, не самы высокааплатны спосаб, цяжкі, але яны гэтым займаюцца, яны задавальняюць патрэбнасці нашых грамадзян. І зарабляюць сабе крыху грошай. Але тады нам трэба будзе вырашаць пытанне, чым іх заняць".
Прапанова аб забароне гандлю ў электрычках паступіла ад Беларускай чыгункі. Па-першае, дзейнасць несанкцыянаваная - пагадненні з перавозчыкам у прадаўцоў няма.
Па-другое, парушаюцца правілы продажу тавараў, зацверджаныя ўрадам. Акрамя таго, пасажыры скардзяцца на занадта агрэсіўную і дакучлівую рэкламу тавара.
Аляксандр Дрожжа, першы намеснік начальніка пасажырскай службы Беларускай чыгункі: "Актыўная рэклама прадаўцамі сваіх тавараў заглушае ў тым ліку і аб'яўленні назваў станцый, прыпыначных пунктаў, іншай інфармацыі, якая неабходная пасажыру ў паездцы. Беларуская чыгунка, як нацыянальны перавозчык, не можа з гэтым мірыцца. Таму што любая паслуга, у тым ліку наша паслуга па перавозцы пасажыраў, павінна аказвацца якасна".
Фармальна дзейнасць прадаўцоў у электрычках легальная. Зарэгістраваныя прадпрымальнікі плацяць падатак, а такі від дзейнасці, як разносны гандаль, дазваляе не ўносіць звесткі ў Гандлёвы рэестр. Зразумела, неабходны і білет на праезд. Наша здымачная група паспрабавала знайсці такіх дарожных прадаўцоў. Але разгаварыць іх было цяжка. У Мінску ў цягнік села жанчына, прадавала шкарпэткі, пластыры і іншую дробязь, але, убачыўшы камеру, хутка згарнула ўсё ў сумку.
Згодна са статутам чыгуначнага транспарту, у пасажырскіх цягніках можа быць арганізаваны продаж прадуктаў харчавання, іншых тавараў у асартыменце, усталяваным перавозчыкам. Але ў дадатку ёсць радок - "за выключэннем цягнікоў рэгіянальных ліній эканамкласа і гарадскіх ліній".
На днях на сайце Мінтрансу завяршылася грамадскае абмеркаванне пытання. Меркаванні пасажыраў падзяліліся пароўну. А гэта значыць, што канчатковага рашэння пакуль няма.
