Вяртаемся да спраў духоўных, якія ўсё-такі нам сёння бліжэй і важней. Работа гэтага чалавека ўжо сапраўды не ўкладваецца ў 8-гадзінны дзень. Алег Абрамовіч - педагог па першай адукацыі, ветэран ваеннай разведкі, які стаў свяшчэннікам. Амаль чвэрць стагоддзя ён штодня здае тэст на чалавечнасць.
Протаіерэй служыць у невялікім вясковым прыходзе ў Салтанаўшчыне Нясвіжскага раёна. І служба яго не абмяжоўваецца богаслужэннямі, літургіямі, хрышчэннямі і вянчаннямі. Дзейнасць настаяцеля накіравана на дапамогу людзям: духоўную, сацыяльную і фінансавую. Гэтую падтрымку адчуваюць не толькі вернікі, якія, калі можна так сказаць, тэрытарыяльна, па прапісцы, адносяцца да прыхода. Дабрачыннасць меж не мае.
Акрамя гэтага, у Салтанаўшчыне было створана першае ў раёне праваслаўнае брацтва. За стварэнне рэлігійнага аб'яднання, а таксама за ўмацаванне духоўных каштоўнасцяў протаіерэй Алег Абрамовіч стаў лаўрэатам прэміі "За духоўнае адраджэнне". Ці складана стаць лепшым у служэнні, і якая праца стаіць за гэтым, даведвалася Алена Борматава.
