Сёння ў Мінску адкрыўся яшчэ адзін міжнародны форум - "Атамэкспа". Прафесіяналы з усяго свету дэманструюць свае распрацоўкі і найноўшае абсталяванне для атамных электрастанцый, а таксама макеты і прэзентацыі праекта "АЭС-2006", па якім узводзіцца і Беларуская АЭС у Астраўцы. Форум прадоўжыцца два дні, за гэты час тут пройдуць і майстар-класы ад прафесіяналаў. На адкрыцці пабывала Ксенія Рабчынская.
Праект "АЭС-2006" з гэтага манітора вырастае ўверх на метр. Гэта не проста 3D, а галаграма, якая дазволіць разгледзець кожную дэталь унутры кожнага будынка на віртуальнай пляцоўцы. Менавіта такой будзе і Беларуская АЭС ужо праз некалькі гадоў. Тут, на выставе "Атамэкспа", сабраліся ўсе, хто мае дачыненне да самай вялікай будоўлі краіны, у тым ліку і прадстаўнікі расійскага генпадрадчыка.
Валерый Лімарэнка, прэзідэнт АТ НДАЭП (Расія): "Працуем у графіку. Сёння створаная каманда, якая выконвае працу з высокай якасцю і з добрымі эканамічнымі паказчыкамі".
Паказчыкі не толькі эканамічныя, але і дамоўленасці па пастаўках абсталявання і фінансаванні праекта сёння на форуме таксама абмяркоўвалі. Віцэ-прэм'ер нашай краіны адзначыў, што фінансавы складальнік у найбліжэйшы час падкарэкціруюць.
Уладзімір Сямашка, намеснік Прэм'ер-міністра Беларусі: "Падрыхтаванае дапаўненне да кантракта нашага праекта, і мы мяркуем, што да канца тыдня мы павінны падпісаць дапаўненне да кантракта, каб усе разумелі правілы гульні".
А правілы гэтыя для ўсіх аднолькавыя. І такія выставы праводзяцца ў тым ліку і для таго, каб зняць усе пытанні. Удзельнічаць у будаўніцтве станцыі можа любая арганізацыя, але, зразумела, толькі тая, якая можа даказаць якасць сваёй прадукцыі і выйграць тэндар. І з кожным годам (а форум праводзіцца ўжо сёмы раз) колькасць удзельнікаў расце, а значыць, расце і цікавасць да атамнай тэмы.
Уладзімір Патупчык, Міністр энергетыкі Беларусі: "Для нас няма дробязяў: ёсць правілы гульні, зразумелыя для ўсіх, ёсць умовы, з якімі можна прыйсці на гэтую станцыю, і ёсць пытанні, якія з'яўляюцца ва ўсіх, каго цікавіць гэты праект. Тут мы спрабуем зняць усе праблемы".
Але, зразумела, на выставу прыходзяць не толькі прафесіяналы, але і атамшчыкі будучыя. Студэнты асабліва ўважліва разглядаюць стэнды. А паглядзець сапраўды ёсць на што.
Усяго на выставе больш за 8 дзясяткаў стэндаў. Гэта праекціроўшчыкі з сусветным імем і вядучыя пастаўшчыкі абсталявання для атамных станцый па ўсім свеце. Геаграфія шырокая: тут не толькі беларускія і расійскія стэнды, але і ўкраінскія, венгерскія і нават нямецкія. Дарэчы, сярод пастаўшчыкоў абсталявання ёсць і беларускія прадпрыемствы.
Пакуль электратэхнічны завод рыхтуе абсталяванне толькі для беларускага праекта, але ў планах - выйсці і на замежныя рынкі. Усяго ў свеце сёння ўзводзіцца больш за 70 энергаблокаў, 2 з іх - гэта беларускія, так што рынак сапраўды вялікі, хоць і патрабавальны.
Выстава "Атамэкспа" прадоўжыцца яшчэ два дні. За гэты час тут пройдуць і некалькі канферэнцый. Праўда, яны будуць зразумелыя толькі прафесіяналам. А вось тое, што будзе зразумелае і цікавае кожнаму, - гэта інфармацыйны цэнтр па атамнай энергіі, які сёння адкрыўся ў Мінску. Гэта сумесны праект Расатама і Міністэрства адукацыі.
Аляксандр Лакшын, першы намеснік гендырэктара па аперацыйным кіраванні "Расатам": "Стварэнне такіх вось цэнтраў накіраванае менавіта на тое, каб як мага большай колькасці наведвальнікаў даваць інфармацыю, што ж такое рэальна атамная станцыя, на якіх прынцыпах яна працуе і як гарантуецца яе бяспека".
У свеце сёння працуе ўжо 21 такі цэнтр. Тут кожны зможа ўбачыць не толькі макеты ўсіх сістэм АЭС, але і нават паўдзельнічаць у гульнях і віктарынах. Гэта ўжо бонусы для самых маленькіх у вялікім дарослым міжнародным праекце пад назвай "Мірны атам".
