Праект указа, які закліканы матываваць грамадзян, сёння прадставілі Прэзідэнту. Так, у дакуменце падрабязна прапісаны механізмы падтрымкі для тых, хто вырашыць свой прыватны дом падключыць да электрасетак, каб гэтай энергіяй ацяпляць памяшканне, падаграваць ваду і гатаваць ежу. Гэта датычыцца жылля, дзе адсутнічае цэнтралізаванае газа- і цеплазабеспячэнне. Ва ўрадзе ўпэўнены: попыт у насельніцтва будзе. Так, 11 тысяч дазволаў на электрыфікацыю было выдадзена летась і ўжо 3 тысячы грамадзян звярнуліся па тэхнічныя дакументы сёлета ў першым квартале.
Кампенсуюць 20 % выдаткаў
Зараз у Беларусі дзейнічаюць стымулюючыя тарыфы на электраэнергію для ацяплення і падагравання вады. Новабудоўлі ўжо на стадыі праекта арыентуюць на падключэнне да электрасеткі. Ад гэтых крокаў ужо відаць вынік. Попыт у насельніцтва значна ўзрос. Што да новых стымулюючых мер, у праекце дакумента прапанавана кампенсаваць пятую частку выдаткаў на электрыфікацыю прыватных дамоў. Кампенсацыя аднаразовая. Каб скарыстацца гэтым правам, неабходна звяртацца ў мясцовую ўладу.
Прапановы ўрада з прыцэлам на ўсеагульную выгаду. Беларуская АЭС пасля запуску дасць краіне дадатковыя аб'ёмы электраэнергіі. Для нас гэта яшчэ і зніжэнне залежнасці ад расійскага газу (эканомія каля 5 мільярдаў кубаметраў), а значыць энергетычная незалежнасць і бяспека. Праект, прапанаваны сёння, Прэзідэнт адобрыў з папраўкай. Рэалізацыя гэтых нормаў дазволіць павялічыць электраспажыванне ў краіне і палепшыць умовы пражывання беларусаў, у першую чаргу на сяле.
