Зараз у актыўнай фазе восеньска-палявыя работы і ўборка агародніны. У кожнай вобласці свая спецыфіка нарыхтоўкі. Напрыклад, на захадзе краіны актыўна прыватнае земляробства. У Гродзенскім рэгіёне капусту, моркву, бурак і бульбу практычна нароўні з буйнымі гаспадаркамі вырошчваюць і фермеры. Трэнд гэтага года - экалагічна чыстае земляробства. Якія культуры паказваюць лепшую ўраджайнасць сёлета, ведае Надзея Сербіненка.
Уборка агародніны працягваецца ва ўсіх рэгіёнах краіны. І па некаторых пазіцыях ураджай абяцае быць нават лепшым, чым летась. Напрыклад, паказчыкі па бульбе ўжо перасягнулі 2018, добра сябе паказвае і цукровы бурак. Нягледзячы на тое што ўборка палёў усё яшчэ працягваецца, агародніну новага ўраджаю ўжо можна купіць на рынках, у магазінах, а неўзабаве і на кірмашах.
Кіраўнік фермерскай гаспадаркі Генрых Мыслівец ганарыцца цяперашнім ураджаем бульбы. Год у плане надвор'я быў складаным, да таго ж гэтае поле пясчанае, але тым не менш клубні атрымаліся добрыя. Уся справа ў строгім выкананні агранамічных тэхналогій. Плюс выключна беларускія сарты бульбы, добра прыстасаваныя да беларускіх кліматычных умоў. У выніку ўраджайнасць нават вышэйшая за леташнюю.
У Мастоўскім раёне развіваецца экалагічна чыстае земляробства. Экалагічна чыстае земляробства сёння - трэнд у сельскай гаспадарцы. Агародніну без хіміі Генрых Мыслівец вырошчвае ўжо другі год. Ураджаі не горшыя, а вось запатрабаванасць на рынку павысілася ў некалькі разоў. Капуста-гігант у лідарах продажаў.
На палях яшчэ бурак і морква, а вось цыбуля ўжо сабраная. Ураджайнасць парадавала. Частку заклалі на захоўванне да вясны, астатняе на продаж. Праўда, проста вырошчваць агародніну ўжо недастаткова. У фермерскай гаспадарцы наладзілі і перапрацоўку. Так павялічваецца дабаўленая вартасць, а значыць і прыбытак.
Добры ўраджай - гэта магчымасць прадаць лішкі на экспарт. Сёлета фермер плануе значна пашырыць геаграфію паставак сваёй прадукцыі.
Добры ўраджай агародніны сёлета і ў агракамбінаце "Ждановічы".
Гэта адзін з найбуйнейшых пастаўшчыкоў агародніны ў сталічныя гіпермаркеты. З палёў амаль цалкам убралі бульбу. Зараз пачалі збіраць буракі, моркву і яблыкі. На чарзе капуста. З чэрвеня на прадпрыемстве працуе новая лінія вакуумнай упакоўкі. Ачышчаная агародніна запатрабаваная на кухнях сталовых, кафэ і рэстаранаў.
У цэлым па краіне бульба ўбрана на палове плошчаў. Ураджайнасць ужо на 10 % большая за леташні паказчык. Паралельна працягваецца ўборка цукровага бураку, капусты, цыбулі. Аграрыі ўпэўненыя, план па нарыхтоўцы агародніны будзе выкананы.
Працягваецца ўборка агародніны. Ураджайнасць па бульбе, цукровым бураку б'е рэкорды
23 сентября 2019