Сучасны камп'ютарны тамограф і два аддзяленні. Такі падарунак атрымала адна з найстарэйшых бальніц Брэста, вядомая ў народзе як чыгуначная. Яе гісторыя пачалася 115 гадоў таму. Тады гэта быў невялікі шпіталь на 50 коек з трыма ўрачамі. Сёння - амаль медыцынскі цэнтр.
Як у найстарэйшай бальніцы горада будуць лячыць па-новаму, цікавілася Вікторыя Патоня. Пра такое абсталяванне марыць любая бальніца. Сучасны камп'ютарны тамограф дазваляе абследаваць пацыентаў ад галаўнога мозгу да сасудаў і касцей. Гэты апарат у Брэсцкай вобласці пакуль самы шматфункцыянальны. Прамянёвая нагрузка і энергазатраты - мінімальныя, дыягностыка - па максімуме. Загадчык рэнтгенаўскага кабінета Аляксандр Купранюк пра новыя магчымасці абсталявання гаворыць з захапленнем. Тут адначасова можна рабіць біяпсію тканіны органаў і сістэм (на анкалогію), а таксама даследаваць сасуды.
Аляксандр Купранюк, загадчык рэнтгенаўскага кабінета Брэсцкай гарадской бальніцы №1: Мы можам паглядзець з дапамогай камп'ютарнага тамографа, кантраснага даследавання, ці ёсць тромбабалія. Гэта значыць, перакрыццё лёгачнай артэрыі і парушэнні кровазабеспячэння ва ўчастку лёгкага. Традыцыйная рэнтгеналогія гэтым не валодае. Старыя камп'ютарныя тамографы гэтых магчымасцей не маюць.
Для працы на апараце навучанне прайшлі чатыры ўрачы, бо галоўнае тут - правільна прааналізаваць і расшыфраваць звесткі. А гэта - новае кардыялагічнае аддзяленне бальніцы. Другое. Разлічана на 45 месцаў. Акцэнт зроблены на неадкладнай дапамозе людзям з хворым сэрцам.
У перспектыве тут створаць гарадскі цэнтр кардыялогіі, куды будуць паступаць пацыенты з падазрэннямі на інфаркт міякарда. Ім будзе аказвацца спецыялізаваная медыцынская дапамога не пасродкам хірургіі, а праз скуру.
Пакуль у рэгіёне такіх пацыентаў лечаць толькі ў абласной бальніцы. Неўзабаве і ў першай гарадской з'явіцца кабінет ангіаграфіі.
Руслан Асавец, загадчык кардыялагічнага аддзялення Брэсцкай гарадской бальніцы №1: Будзе аказвацца дапамога ў адпаведнасці ўжо з сусветнымі стандартамі. З правядзеннем каранараграфіі, ангіапластыкі і стэнтыравання. На гэты момант арганізаваныя палаты інтэнсіўнай тэрапіі для такіх пацыентаў, якія будуць сюды перакладацца з кабінета ангіаграфіі пасля аказання ім спецыялізаванай тэрапіі.
Пасля рамонту адкрылася гінекалагічнае аддзяленне, у 2014 будзе яшчэ адно. У рамках рэканструкцыі не забылі і пра самых маленькіх пацыентаў.
Канстанцін Сумар, старшыня Брэсцкага аблвыканкама: Мы адначасова тут сканчаем паліклініку для нашых дзяцей на 600 наведванняў за змену. Гэтая тая праблема, якая не вырашалася доўгія гады.
Да 2015 года трэба абнавіць яшчэ пяць аддзяленняў бальніцы. Тады ўжо сапраўды пра ўзрост найстарэйшай медустановы горада прыйдзецца толькі здагадвацца.
