Каля нацыянальнага аэрапорта з'явілася гіганцкае крэатыўнае ворыва ў выглядзе надпісаў. Так незвычайна да правядзення сяўбы азімых збожжавых падышоў Мінскі трактарны завод. Для супермаштабнага «пісьменства па зямлі» спатрэбіліся самыя магутныя «Беларусы». Эстафету флэшмобу сёння падхапілі і супрацоўнікі МТЗ на тэрыторыі завода. Эксклюзіўныя кадры «з нябёсаў» - у рэпартажы Аляксея Кандраценкі.
«Беларусь - краіна мары». Кожны, хто ў гэтыя дні прылятае ў Нацыянальны аэрапорт Мінск або ляціць з яго, атрымлівае вось такое прывітанне. З невялікай вышыні на полі за пяць кіламетраў ад паветранай гавані чытаецца фраза-гігант. Для гэтага два тыдні працавалі тры самыя магутныя «Беларусы». У найбліжэйшы час крэатыў даступны авіяпасажырам, зрэшты, ён напэўна трапіць і на спадарожнікавыя карты Google.
Такі патрыятычны флэшмоб Мінскага трактарнага завода - свайго роду даніна павагі працы хлебаробаў, якія паспяхова правялі ўборку збожжа на палях. Акцыя не магла застацца без працягу.
Сёння аграрыяў, якія працавалі і на «Беларусах», вітае моладзь МТЗ. 1200 супрацоўнікаў завода ствараюць такі ж надпіс на пляцоўцы ля прадпрыемства.
І вось усе 1200 удзельнікаў флэшмобу літаральна ўтварылі такую жывую кампазіцыю. Адсюль - з зямлі - мы, вядома, гэтага не зразумеем. Таму зноў ўзлятаем!
«Беларусь - краіна мары». У афармленні ўжо не вышыванка, а таварны знак трактарнага завода. Жывая кампазіцыя - не проста стыльнае падвядзенне вынікаў аграсезона, але і рэпетыцыя перад Днём машынабудаўніка. 22 і 23 верасня трактаразаводцы абяцаюць правесці прафесійнае свята яшчэ больш маштабна и відовішчна.
