Прыём грамадзян у Бярозаўцы правёў інспектар па Гродзенскай вобласці Іван Лаўрыновіч

14 Лютага 2020
Пытанні жыллёвага фонду, добраўпарадкавання тэрыторый і якасці вады абмяркоўвалі сёння на прыёме грамадзян у Бярозаўцы, яго правёў памочнік Прэзідэнта - інспектар па Гродзенскай вобласці Іван Лаўрыновіч. Большасць зваротаў бытавога характару. Жыхарка вёскі Вінкаўцы Лідскага раёна скардзілася на дрэнную ваду ў студнях. Адразу ж было дадзена даручэнне спецыялістам выехаць на месца і разабрацца з сітуацыяй. З калектыўным зваротам прыйшлі жыхары адной са шматпавярховак па вуліцы Тухачэўскага ў Лідзе. Іх дом пабудаваны ў канцы 80-х і патрабуе рамонту, а ў двары катастрафічна не хапае паркавальных месцаў. Пытанне абяцалі вывучыць і паспрабаваць знайсці кампраміснае рашэнне, магчыма, з частковым прыцягненнем сродкаў саміх жыхароў.

Іван Лаўрыновіч, памочнік Прэзідэнта Беларусі - інспектар па Гродзенскай вобласці: "Разумеючы, як жывуць нашы людзі, трэба паглыбляцца ва ўсе пытанні больш прадметна і ставіць першую мэту, каб дапамагчы ў самы найбліжэйшы час,  нейкія доўгатэрміновыя праекты рабіць, што мы зробім да 2025 года. Сказаць людзям праўду і максімальна дапамагчы ў пэўнай сітуацыі".

Такія сустрэчы правядуць ва ўсіх малых гарадах і пасёлках рэгіёна, каб даведацца, што хвалюе жыхароў глыбінкі і якія праблемы патрабуюць першачарговага рашэння.