6 тысяч вайскоўцаў, больш за 500 адзінак тэхнікі і 60 паветраных суднаў. Святкаванне Дня Незалежнасці атрымалася сапраўды грандыёзным. Склад удзельнікаў у параўнанні з мінулым годам павялічаны ўдвая - напрыклад, механізаваная калона расцягнулася амаль на тры кіламетры, а выступленне роты ганаровай варты нікога не пакінула абыякавым. З самай раніцы ў баявым страі і наш карэспандэнт Аляксандр Смірноў.
Для вайскоўцаў гэтая раніца пачалася вельмі рана, у прынцыпе, як і для нас - тэлевізіёншчыкаў. Ужо а шостай гадзіне калона тэхнікі ехала па вуліцах сталіцы, рухаючыся на праспект Машэрава. Надвор'е сустрэла ўсіх у даволі хмурным настроі, і, вядома, з'явіліся сумненні: не ці перашкодзіць яно правядзенню парада? На гэты выпадак у экіпажа танка Т-34 ёсць традыцыя: пацерці фару на ўдачу. Мы зрабілі тое ж самае.
Традыцыя не падвяла, за час параду не ўпала ніводнай кроплі. Але вайскоўцы - тыя людзі, якія разлічваюць толькі на свае сілы. Секунда ў секунду строга па плане пачынаецца парад войскаў Мінскага гарнізона.
Выразным страявым крокам, гордым поглядам і не па гадах дарослай упэўненасцю шэсце адкрываюць барабаншчыкі Мінскага сувораўскага вучылішча. Нібы жывы метраном, яны задаюць тэмп усёй пешай калоне. За імі ў страі, сімвалізуючы сувязь пакаленняў, франтавая каробка - курсанты Ваеннай акадэміі ў форме салдат Вялікай Айчыннай вайны. Сярод іх Сяргей Смаляк - спадчыннік воінаў Вялікай Перамогі. У яго на грудзях сапраўдныя ўзнагароды прадзеда. Ля самага сэрца ордэн Айчыннай вайны 1 ступені за вызваленне Беларусі.
У пешай калоне 20 парадных разлікаў - прадстаўнікі трыццаці злучэнняў і воінскіх часцей, а таксама пяці ўстаноў адукацыі. Многае сёння ўпершыню. Напрыклад, удзел тэрытарыяльных войскаў - іх прадстаўляе Маладзечанскі раён. Чаканіць крок пяхота, танкісты, мотастралкі, МНС, пагранічнікі, ВПС, СПА і, вядома ж, наш гонар - сілы спецыяльных аперацый у берэтах нябеснага колеру.
За пешай стартуе механізаваная калона. Яе вядзе ў бой легенда - танк Т-34. І гэта яшчэ адна важная традыцыя. І з яе запускаецца машына часу, якая пераносіць гледачоў праз 70-гадовую гісторыю аж да сучаснасці. Радавы Дзмітрый Стафановіч рыхтаваўся кіраваць рэтратэхнікай два месяцы і прызнаецца, што зараз гісторыя стала яго хобі.
Дзмітрый Стафановіч, механік-вадзіцель танка Т-34: "Гэты танк сапраўды ваяваў, ёсць нават прабоіны на вежы. Яго з балота дасталі, адрамантавалі, адрэстаўравалі, і зараз ён удзельнічае ў парадзе".
Ля стэлы "Мінск - горад-герой" праязджае сучасная тэхніка. Агульная працягласць калоны - больш чым тры кіламетры. Сёлета склад удзельнікаў павялічаны ў два разы. Танкі, баявыя машыны розных мадэляў і мадыфікацый. Сярод іх асобнай увагі заслугоўвае айчынная распрацоўка - лёгкабраніраваны аўтамабіль V1. "Волат" - незаменны памочнік ваеннага спецназа, выдатна падыходзіць для выканання разведвальных і дыверсійных задач. Побач з ім найноўшы браніраваны "драпежнік" - "Кайман" на 90 % складаецца з камплектуючых беларускай вытворчасці, машына ўжо прайшла дзяржвыпрабаванні і будзе прынятая на ўзбраенне.
Упершыню ў парадзе ўдзельнічае беспілотная тэхніка - уся айчынная. Гэта комплексы як самалётнага, так і верталётнага тыпу. Сярод іх ёсць і малыя, і сапраўдныя гіганты розных функцый і прызначэння. Ёсць комплекс, які здольны знішчыць лёгкабраніраваныя цэлі.
За лёгкімі беспілотнікамі цяжкая артылерыя: мінамётныя комплексы, самаходныя гаўбіцы і гарматы, артылерыйскія сістэмы і ЗРК. Сярод іх ярка выдзяляецца "Паланэз" - гонар айчыннага абаронна-прамысловага комплексу. За элегантнасцю тоіцца вялізная сіла. Гэта самая магутная зброя ракетных войскаў у беларускай арміі. З мінімальнай хібнасцю дывізіён адным залпам знішчае 48 цэляў на далёкасці да 200 кіламетраў. У адным шэрагу "Смерч", "АСА", комплекс СПА "Тор-М2" і С-300, якія і падкрэсліваюць абаронны патэнцыял Беларусі.
У небе над сталіцай авіяпарад. Яго адкрывае тройка Мі-8 з нацыянальным флагам, штандарамі Узброеных сіл і ВПС. Затым у небе з'яўляецца добра знаёмы сілуэт самага грузападымальнага верталёта ў свеце - гэта Мі-26 у складзе звяна Міністэрства па надзвычайных сітуацыях. Яго суправаджаюць два канадцы AS-355 Ecureuil. А завяршаюць марш вінтакрылых машын "зубастыя алігатары" - расійскія К-52.
Як, Су, МіГ - цікавасць гледачоў расце з кожнай секундай. Беларускія ВПС змяняюць Паветрана-касмічныя сілы Расійскай Федэрацыі - звяно найноўшых франтавых бамбардзіроўшчыкаў Су-34 і група самалётаў Су-27. У хвасце эшалона ваенна-транспартны Іл-76 у суправаджэнні пяці Л-39. Мірнае неба расфарбаванае ў колеры нацыянальнага флага.
Гледачам сумаваць няма калі: на імправізаваным пляцы не менш відовішчная частка праграмы - пляц-парад зводнай роты ганаровай варты. Фактычна фігуры вышэйшага пілатажу на зямлі. Кожны год для гледачоў рыхтуецца прынцыпова новая праграма. Прычым аўтарамі асобных яе элементаў з'яўляюцца самі вайскоўцы.
Павага і падзяка сучаснага пакалення героям-франтавікам, партызанам і падпольшчыкам - вось галоўны лейтматыў ваеннага парада. І яшчэ адна важная дэталь - пачуццё ўпэўненасці ва ўласнай бяспецы і ў заўтрашнім дні. Прынамсі будучыню Беларусі ёсць каму абараняць, ёсць чым і ёсць дзеля каго. У такія хвіліны і ўзнікае адчуванне свята.
