Святочны канцэрт - падарунак мінчанам і гасцям сталіцы да Дня Перамогі

На плошчы Перамогі, дзе працуе наш карэспандэнт Вераніка Бута, ідзе падрыхтоўка да святочнага канцэрта - гэта яшчэ адзін падарунак мінчанам і гасцям сталіцы. Гэтымі хвілінамі плошча Перамогі ператвараецца ў імправізаваную сцэну.

Пакуль пад'езды да плошчы адчыненыя. Але пазней вечарам у сувязі з канцэртам тут, на праспекце Незалежнасці, перакрыюць рух, а грамадскі транспарт трохі зменіць маршрут. Зараз ідзе апошняя тэхнічная падрыхтоўка, налада гуку. Для зручнасці гледачоў ля манумента ўстаноўлены панарамны экран, па перыметры плошчы яшчэ чатыры двухбаковыя экраны паменш. Літаральна праз тры гадзіны тут загучаць песні ваенных гадоў у выкананні зорак беларускай эстрады і маладых талентаў. Гэта будуць песні аб гарадах-героях.

Дарэчы, такія канцэрты ў самым цэнтры беларускай сталіцы - гэта ўжо традыцыя. Штогод увечар 9 мая ля Вечнага агню збіраюцца розныя пакаленні, каб перадаць эстафету міру, каб паказаць, якія б цяжкасці на шляху ні ўзнікалі, перамагчы можна толькі з верай у лепшае, толькі з сэрцам, напоўненым музыкай і любоўю. 

Нагадаем, на плошчы Перамогі ў 21:30 адбудзецца святочны канцэрт "У славу агульнай Перамогі". Прамую трансляцыю будзе весці тэлеканал "Беларусь 1".