Праваахоўнікі, МНС і медыкі пяройдуць на ўзмоцнены рэжым дзяжурства з 12 лютага ў сувязі з правядзеннем выбараў у мясцовыя Саветы дэпутатаў. Ратавальнікі ўжо праверылі спраўнасць супрацьпажарных сістэм і бяспеку ўчасткаў. У сваю чаргу ДАІ забяспечыць рух, а медыкаў размесцяць на кожным участку. Ва ўсіх структурных падраздзяленнях МУС наладжана ўзаемадзеянне з выбаркамамі розных узроўняў, з мясцовымі выканаўчымі органамі і іншымі ведамствамі.
Уладзімір Станілевіч, начальнік аддзела ўпраўлення аховы правапарадку ГУАПП МУС Беларусі:
"На кожным выбарчым участку супрацоўнік міліцыі працуе ва ўзаемадзеянні са старшынёй выбарчай камісіі. І толькі пасля яго першапачатковых дзеянняў, калі старшыня самастойна не можа справіцца з якім-небудзь інцыдэнтам, умешваецца супрацоўнік унутраных спраў. На кожным участку як падчас папярэдняга галасавання, так і ў асноўны дзень будзе дзяжурыць супрацоўнік".
Па словах прадстаўнікоў усіх ведамстваў, фактараў, якія могуць аказаць негатыўны ўплыў на ход выбарчай кампаніі, не зафіксавана.
