Сярод тых, каму ў гэтыя святочныя дні ў нашай краіне асаблівая ўвага, і пажылыя людзі. Пажаданні здароўя, даўгалецця і словы ўдзячнасці гучалі сёння ў мінскім доме-інтэрнаце для пенсіянераў і інвалідаў. Тут сустракалі гасцей, а разам з імі і свята. Навагодні паказ, настрой і падарункі сюды прывезлі педагогі і вучні Астрашыцка-Гарадоцкай сярэдняй школы, дзе навучаецца малодшы сын Прэзідэнта нашай краіны Мікалай. Гасцей сустракалі як старых сяброў - ужо больш за два гады школа шэфствуе на домам-інтэрнатам. Гэтым разам для яго насельнікаў творчая група падрыхтавала спектакль "Мадагаскар" паводле аднайменнага мультфільма. Добрая гісторыя пра тое, як казачныя персанажы з далёкага вострава, пераадольваючы перашкоды і выпрабаванні, прыносяць свята туды, дзе яго вельмі чакаюць.
Дарыць акрамя творчых яшчэ і смачныя падарункі – таксама стала добрай традыцыяй. І сёння да стала насельнікаў дома-інтэрната - малочныя прадукты з падворка Кіраўніка дзяржавы.
У доме-інтэрнаце на Ваўпшасава школьнікі частыя госці не толькі на святы. Вучні нярэдка наведваюць пастаяльцаў, працуюць тут на суботніку, прывозяць пачастункі і праводзяць час разам за чаяпіццем. Бо нічога няма даражэй за ўвагу, клопат і добрыя эмоцыі. Асабліва гэтымі святочнымі днямі.
