Страчаны каток у Мінску знайшоў Дзяржкантроль праз 7 гадоў

2 Лютага 2015

Дарагі мабільны каток пабудавалі ў сталіцы 7 гадоў таму. І на гэтым бізнес-план яго гаспадароў скончыўся. Гісторыяй і зацікавіліся кантралёры, тым больш што ў Беларусі хапае прыкладаў паспяховай працы каткоў. Шкоду падлічыў Юрый Шаўчук.

Гэта лядовы каток у сталічным мікрараёне Чыжоўка. 8 гадоў мясцовыя жыхары тут катаюцца на каньках, гуляюць у хакей і займаюцца спортам. Адначасова на лёд тут могуць выйсці больш як 200 чалавек - гэта, мабыць, самая вялікая адкрытая пляцоўка ў Беларусі.

Здымкі мы праводзілі раніцай у будны дзень, але нягледзячы на гэта, тут няма дзе яблыку было ўпасці. Яно і нядзіўна, бо сярод іншых плюсаў гэтай пляцоўкі - дэмакратычныя цэны на ўваход і пракат канькоў. Як вынік - сталая наведвальнасць і штомесячны прырост прыбытку.

Мікалай Азміцель, начальнік службы мабільнага катка "Чыжоўка": "Сёлета, напрыклад, толькі за студзень месяц дзвесце мільёнаў каток зарабіў".

А гэта ўжо каток, дакладней, тое, што ад яго засталося, які павінны былі ўсталяваць яшчэ ў 2008 годзе ў Фрунзенскім раёне. Аднак гэтага не здарылася, і з тых самых часоў абсталяванне проста ляжыць і ржавее, абсалютна нікому не патрэбнае.

Па сутнасці, гэты каток - брат-блізня таго, што ўсталяваны ў Чыжоўцы. Толькі калі там пляцоўка прыносіць наведвальнікам радасць, а гаспадарам грошы, то тут усё наадварот. Іншымі словамі, гэта яркі прыклад безгаспадарчасці. Калісьці на закупку абсталявання па курсе 2008 года было выдаткавана амаль паўтара мільёна долараў. А вось з прыбыткам неяк не атрымалася. Натуральна, такім дзіўным бізнес-планам зацікавіліся спецыялісты Дзяржкантролю.

Галіна Дрошчанка, галоўны спецыяліст КДК Беларусі: "Абсталяванне знаходзіцца ў жаласным стане. Мы можам бачыць і механічныя пашкоджанні, і карозію. І на сённяшні дзень аднавіць абсталяванне практычна немагчыма".

Да таго як прапісацца ў двары ЖРЭА №2 Фрунзенскага раёна сталіцы, каток паспеў папрацаваць, праўда, нядоўга. Некалькі месяцаў ён стаяў каля Палаца спорту. Пазней было вырашана перанесці лядовую скрынку на вуліцу Жудро. Праўда, перш канструкцыю часова захоўвалі на вуліцы Матусевіча, а як гаворыцца, няма нічога больш сталага, чым часовае.

Галіна Дрошчанка, галоўны спецыяліст КДК Беларусі: "У 2011 годзе абсталяванне паступіла ва ўпраўленне ФАК Фрунзенскага раёна. У гэтым жа годзе адміністрацыя прыняла рашэнне аб будаўніцтве катка. Аднак сёння абсталяванне па-ранейшаму знаходзіцца на адкрытай пляцоўцы".

Справа ў тым, што да моманту ўзвядзення катка ў 2012 годзе абсталяванне ўжо добра знасілася. І нядзіўна, бо пад адкрытым небам яно праляжала амаль тры гады. Вось і атрымалася, што на рамонт канструкцыі грошай не было ні тады, ні сёння. А як так сталася, што ўвесь гэты час каток папросту ржавеў і быў нікому не патрэбны, і чым гэта можа павярнуцца для вінаватых, зараз разбіраюцца ў Дзяржкантролі. 


Папулярныя

Рэкамендуемыя