Апякунскі савет плануюць стварыць пры РНПЦ дзіцячай анкалогіі, гематалогіі і імуналогіі

Пры РНПЦ дзіцячай анкалогіі, гематалогіі і імуналогіі плануюць стварыць апякунскі савет. Ён будзе курыраваць пытанні развіцця цэнтра: скаардынуе працу бізнесу і сістэмы аховы здароўя, дапаможа ў інфармаванні насельніцтва. Да рашэння шматлікіх пытанняў гатовыя далучыцца сенатары. Пра гэта сёння заявіла Наталля Качанава. Перад старым Новым годам старшыня верхняй палаты парламента наведала юных пацыентаў і правяла круглы стол з прадстаўнікамі Міністэрства аховы здароўя. Былі закранутыя пытанні рэалізацыі пілотнага праекта, абмяркоўваліся тэмы будаўніцтва жылля для супрацоўнікаў і паляпшэння ўмоў працы маладых спецыялістаў.

Уладзімір Каранік, Міністр аховы здароўя Беларусі: "На сённяшні момант нам ёсць чым ганарыцца. Па паказчыках вылячэння дзіцячага насельніцтва мы займаем вядучыя пазіцыі ў свеце. Уваходзім у дваццатку краін. Калі ўзяць аддалена вынікі лячэння, у цэлым усе захворванні, з якімі сутыкаецца дзіцячая анкалогія, то 10-гадовае вылячэнне складае больш за 75 працэнтаў. Пакуль гэтая лічба не дасягнула 100 працэнтаў, але мы і далей будзем працаваць над паляпшэннем вынікаў".

Не засталіся без увагі і юныя пацыенты. На сцэне актавай залы РНПЦ  прайшла калядная пастаноўка. Артысты Моладзевага драмтэатра  прымерылі вобразы казачных персанажаў: Дзеда Мароза і Снягуркі. Пасля спектакля ад ганаровых гасцей маленькія пацыенты атрымалі салодкія падарункі.
Сёння ў РНПЦ дзіцячай анкалогіі не толькі праводзяць аперацыі рознай складанасці, функцыянуе і банк стваловых клетак пупавіннай крыві, а таксама адкрыта лабараторыя генетычных біятэхналогій. Гэта адзін з вядучых медцэнтраў у свеце.