На двух паверхах размясціліся ўтульныя групы, музычныя і спартыўныя залы. На базе гэтага дзіцячага садка адкрыюць другі ў вобласці рэсурсны цэнтр прафесійнай адукацыі. Пра тое, як вырашаецца пытанне крокавай даступнасці ў малых гарадах, раскажа Юлія Токар.
Марына Бядрыцкая з хваляваннем сочыць, як трохгадовая Вераніка асвойваецца ва ўтульнай групе. Спачатку ў кулінарным кутку, пасля ў ролі цырульніка. Ад новых забаў і цацак дзеці ў захапленні.
Сёння ў Жодзіне як мінімум для 160-ці сем’яў сапраўднае свята. Менавіта столькі дзятвы зможа прыняць гэта дашкольная ўстанова. На двух паверхах камфортныя групы, музычныя і спартыўныя залы, жывыя куткі. Тут адкрыюць і рэсурсны цэнтр для прафадукацыі педагогаў. Ён стане другім у вобласці.
Літаральна праз месяц у горадзе машынабудаўнікоў адкрыюць яшчэ адзін новы дзіцячы садок – ужо на 250 месцаў. Выхаванцы змогуць займацца гімнастыкай, плаваннем і асвойваць камп'ютары.
У гэтым сучасным класе ў гульнявой форме дзеці будуць вывучаць IT-тэхналогіі. На камп'ютарах рыхтуюць да школы, вучаць тэкставыя праграмы. А на мульцібордзе асвойваюць мадэляванне і графіку.
На вуліцы для кожнай групы прадугледжаны спартыўныя гарадкі і гульнявыя пляцоўкі з правіламі дарожнага руху. Дарэчы, такімі паскоранымі тэмпамі ў новых мікрараёнах Жодзіна вырашаецца пытанне крокавай даступнасці. Гэта будзе ўжо чатырнаццатая дашкольная ўстанова.
