Грукат гармат, стрэлы, якія ўзляталі ў неба, мужныя рыцары ў зіхатлівых даспехах - гэтыя і іншыя атрыбуты бітвы XV стагоддзя паўтарылі ў XXI.
Фестываль гістарычнай рэканструкцыі "Наш Грунвальд" пагрузіў гледачоў у атмасферу гістарычнай бітвы. Штогадовае мерапрыемства традыцыйна збірае мноства ўдзельнікаў і гледачоў. Прадстаўнікі дзясяткаў рыцарскіх ордэнаў змагаюцца ў паядынках адзін на адзін, бугуртах, турнірах лучнікаў, алебардыстаў, конных турнірах. Галоўнай падзеяй фестывалю з'яўляецца маштабная рэканструкцыя Грунвальдскай бітвы. Акрамя сузірання паядынкаў і гістарычнай рэканструкцыі, тут можна купіць прадукцыю рамеснікаў, пакаштаваць стравы нацыянальнай беларускай кухні, пастраляць з лука і навучыцца некаторым прыёмам бою на мячах. На пляцоўках фестывалю таксама праходзяць майстар-класы па традыцыйных рамёствах. Вячэрняя праграма ўключае ў сябе выступленні рок- і фолк-гуртоў.
Масавае рыцарскае спаборніцтва "Захоп караля". Мэта бакоў - першымі дабрацца да караля праціўніка і захапіць яго. Кароль можа абараняцца, але яму забаронена змяняць сваё месцазнаходжанне.
Рыцарскі турнір. На працягу некалькіх гадзін пад пякучым сонцам самыя адважныя прадстаўнікі рыцарскіх ордэнаў вызначалі наймацнейшага. Пасля сутычак на мячах знясіленыя героі валіліся на зямлю (вага даспехаў - каля 30 кг). Да іх падбягалі дамы ў сярэднявечным адзенні і паілі вадой з гарлачыкаў.
Пасля аднаго з паядынкаў закаханы рыцар зрабіў прапанову сваёй дзяўчыне! Судзячы па рэакцыі ўмілаванай рыцара, прапанова стала для яе поўнай нечаканасцю. Пад бурныя апладысменты натоўпу гледачоў яна дала сваю згоду.
Рэканструкцыя адной з самых славутых перамог нашых продкаў атрымалася маштабнай і маляўнічай. На сонцы ў парахавым дыме зіхацелі даспехі рыцараў, у паветры лёталі дзясяткі стрэл, стройнымі радамі ішлі алебардысты. Канчатак бітвы ўзвясцілі дзясяткі ўскінутых у паветра мячоў воінаў ВКЛ і іх саюзнікаў.
