Амаль 5 тысяч новых рабочых месцаў будзе створана сёлета толькі ў Магілёўскай вобласці. Гаворка ідзе пра бязвыплатныя субсідыі для адкрыцця свайго бізнесу і пра бясплатнае перанавучанне запатрабаваным прафесіям. Дапамогуць гарадскія, а асабліва раённыя адміністрацыі і ў самазанятасці дома. І не столькі для таго, каб з часам забыць пра такое паняцце, як "беспрацоўе", а колькі для стварэння магчымасцяў зарабіць людзям. Тым больш што зараз гэта, зыходзячы з навацый дэкрэта № 1, падпісаных напярэдадні Прэзідэнтам, прамы абавязак мясцовых райвыканкамаў. Але ці гатовыя ў раёнах да такой перазагрузкі - сітуацыю вывучаў Андрэй Ястрабаў.
Наталля Батранец, магчыма, і ўладкавалася б працаваць па прафесіі прадаўцом, тым больш што ў суседнім магазіне адкрыта вакансія, але, гаворыць, заўсёды хацелася заняцца сваёй справай.
Наталля Батранец, прыватны прадпрымальнік:
"Нам прыйшла ідэя адкрыць магазін. Грашовых сродкаў не хапала, мы звярнуліся ў камісію райвыканкама, да старшыні. Нам выдзелілі субсідыю. 18 лістапада мы адкрылі магазін для пчаляра".
Па інструмент сюды зараз прыязджаюць з суседніх Чэрыкава і Мсціслава. Нават падумваюць у райцэнтры правесці форум пчаляроў, настолькі запатрабаваным аказаўся новы бізнес. І ён стаў не адзіным. Бо Крычаву з адным з самых высокіх узроўняў беспрацоўя было дазволена выдаваць і самыя высокія памеры субсідый. Так з'явіліся з дзясятак рамеснікаў, прадаўцоў і майстроў.
Галіна Лятэцкая, начальнік упраўлення па працы, занятасці і сацыяльнай абароне Крычаўскага райвыканкама:
"У 2017 годзе памер для самазанятасці для Крычаўскага раёна быў усталяваны ў памеры 15 бюджэтаў пражытачнага мінімуму. Дзесьці 2960 рублёў - вельмі добрая сума для арганізацыі самазанятасці".
Генадзь Рабінчыкаў адзін з тых, хто на свой бізнес не адважыўся. Але таксама скарыстаўся прэферэнцыямі. Вадзіцель у мінулым, у свае 53 прайшоў перанавучанне за кошт цэнтра занятасці. Зараз на ім энергетычная бяспека дзясятка ўстаноў.
Падобная гісторыя ў Аляксандра Канкадзэ - зараз электрыка. 6 месяцаў спатрэбілася на перанавучанне. Тое, што ўсё абсталяванне на крычаўскім ФАКу працуе без перабояў, гэта яго заслуга. Гаворыць, без працы сядзець нядобра. На радзіме, у Грузіі, так не прынята.
Кірмашы вакансій, індывідуальныя гутаркі, вядома, прынеслі свой плён, гавораць у Крычаўскім райвыканкаме. За год каэфіцыент напружанасці на рынку працы ўдалося знізіць амаль удвая. Такога выніку тут не было ніколі. А ў мясцовых улад з'явіліся новыя амбіцыі - пакет прапаноў для інвестараў.
Перспектыўных праектаў, пра якія пакуль толькі марыць раён, нямала. Гэтая і вытворчасць пітной вады, і будаўніцтва ветрапарка з сонечнымі батарэямі. Не супраць тут развіваць будаўнічую індустрыю, напрыклад, арганізаваць вытворчасць будаўнічых сумесяў. Шукаюць тут новых гаспадароў і для закінутых будынкаў.
Частку памяшканняў Крычаўскага завода гумовых вырабаў ужо здалі ў арэнду. Ідзе мантаж сучаснага швейнага абсталявання. Ужо ў першым квартале гэтага года тут пачнуць вытворчасць трыкатажных вырабаў для аднаго з расійскіх брэндаў. Амаль 3,5 сотні рабочых месцаў дасць новая вытворчасць. І ўсіх інвестар гатовы навучыць на месцы, не выходзячы з цэха.
Такая цікавасць з боку замежных інвестараў да паўднёва-ўсходняга раёна невыпадковая. Льготныя прэферэнцыі па падатках - адна з пераваг. Як прыклад - прапановы на сайце Крычаўскага райвыканкама праглядзелі карыстальнікі з 138 краін свету. І не безвынікова.
Дзмітрый Бачкоў, старшыня Крычаўскага райвыканкама:
"Ёсць праект па сумеснай дзейнасці з кітайскай кампаніяй. Ужо юрыдычная асоба зарэгістравана на тэрыторыі Крычаўскага раёна. І мы зараз працягваем працу па рэалізацыі дадзенага інвестпраекта".
Адразу дзве пляцоўкі гатовы заняць інвестар з Паднябеснай - пад вытворчасць грыбоў і аўтамабільных запчастак.
