Сёння, у апошні дзень лета, для тысяч першаклашак і заўтрашніх выпускнікоў па ўсёй краіне празвінелі першыя званкі і прайшлі ўрачыстыя лінейкі. Важнасць падзеі для дзяцей, іх бацькоў і педагогаў складана пераацаніць. Усяго сёлета за парты сядуць больш за 980 тысяч вучняў, а гэта значыць, што кожны дзясяты беларус - школьнік. Ужо заўтра пройдуць так званыя гасцявыя ўрокі, а пасля пачнецца вывучэнне моў, грамадскіх і дакладных навук. Дарэчы, напярэдадні 1 верасня прыемная навіна для педагогаў. У Беларусі ўсталяваны надбаўкі да зарплаты настаўнікам. У адпаведнасці з пастановай Саўміна, на дабаўку могуць разлічваць педагогі дадатковай адукацыі, якія аказваюць платныя паслугі ў школах. Адукацыйны працэс пачнецца ў найбліжэйшыя дні, пакуль самыя яркія эмоцыі ад сустрэчы са школай і віншаванні - у рэпартажы Антаніны Станкевіч.
Першы раз у першы клас. Вучні сталічнай 12-й гімназіі трохі хвалююцца, але імкнуцца стрымліваць эмоцыі. Бо сёння яны ўжо не проста дашкольнікі - першаклашкі. Строгія касцюмы, букеты кветак, знаёмства з першай настаўніцай. Гэты дзень, мабыць, стане галоўным у іх школьным жыцці.
Зараз задача першакласнікаў - пазнаёміцца з першай настаўніцай і аднакласнікамі. Бо на будучыя 11 гадоў яны стануць адной вялікай сям'ёй.
Першакласнікі з Оршы з цікавасцю гартаюць новы буквар. Вывучаючы алфавіт, дзеці знаёмяцца і са славутасцямі горада і раёна. На літару "К" размешчана гістарычная даведка пра Калегіум езуітаў. На літару "Л" - гісторыя мясцовай Лаўры. Змяняецца горад і змяняецца змест буквара. Таму сёлета гэта ўжо пятае выданне. Сімвалічна, што першы буквар у Беларусі надрукавалі як раз у Оршы.
Ужо заўтра за парты сядуць 110 тысяч першакласнікаў. Кожны атрымае ў падарунак кнігу "Беларусь - мая Радзіма". Не менш за першакласнікаў хвалююцца і настаўнікі, асабліва маладыя. Больш за 5 тысяч выпускнікоў педагагічных ВНУ і каледжаў правядуць свае першыя ўрокі.
А гэтыя дзеці яшчэ не зусім вераць, што гэты першы званок прадвяшчае хуткае расставанне. Яшчэ нейкіх 300 дзён і вучні выпускных класаў зменяць свой статус на новы, не менш хвалюючы і адказны. Пакуль, у тым ліку і ў іх гонар, сёння музыка, віншаванні і пажаданні шчаслівага шляху. Але самае галоўнае, на працягу навучальнага года настаўнікі будуць асабліва ўкладваць у іх сілы і душу, каб 11-класнікі годна прайшлі ўступную кампанію.
З пачаткам навучальнага года сёння віншуюць вучняў, настаўнікаў і бацькоў. Намеснік міністра адукацыі і першы сакратар Саюза моладзі - на лінейцы ў 24-й гімназіі. Гэтая навучальная ўстанова ўжо 9 гадоў запар займае першае месца ў рэйтынгу мінскіх школ. Яе вучні - пераможцы шматлікіх прадметных алімпіяд, спартыўных спаборніцтваў і музычных конкурсаў.
Ужо заўтра вучні адправяцца на гасцявыя ўрокі. Самыя пазнавальныя з іх пройдуць у Нацыянальнай бібліятэцы, Цэнтрвыбаркаме, Лошыцкім парку і іншых грамадскіх і культурных месцах. Затым з новымі сіламі вучні возьмуцца за матэматыку, мовы і прыродазнаўчыя навукі.
