Крыху больш за два тыдні засталося на падрыхтоўку да новага навучальнага года. Напярэдадні першага званка на прылаўках магазінаў пашырыўся асартымент школьных прылад, а дызайнеры прапанавалі калекцыі новай школьнай формы. Па ўсёй Беларусі напярэдадні Дня ведаў пройдуць школьныя кірмашы. Толькі ў Віцебскай вобласці іх адкрыецца больш за дзевяноста.
Школьную тэму прадоўжыць Марына Раманоўская. Да новага навучальнага года на гэтым прадпрыемстве пачынаюць рыхтавацца задоўга да першага званка. Тут шыюць школьную форму і для дзяўчынак, і для хлопчыкаў. У калекцыі больш за сто сучасных мадэляў.
Спадніцы, штаны, сарафаны. Да школьнага сезона на прадпрыемстве выпусцілі больш як восем з паловай тысяч адзінак школьнай формы. Дызайнеры робяць акцэнт на натуральных матэрыялах. Гэта паўшарсцяная, шарсцяная і віскозная тканіна.
Сёлета ў трэндзе класіка. Строгія касцюмы з цёмнай тканіны: чорнай, шэрай і сіняй. Сярод новых прапаноў - пінжакі для хлопчыкаў з натуральнай шэрсці.
Марына Кошалева, вядучы мастак-мадэльер прадпрыемства па пашыве адзення: "Немалаважным з'яўляюцца розныя аздобныя элементы. Мы робім спалучэнне тканіны. Выкарыстоўваем такі элемент, як налакотнікі, трыкатажныя каўнерыкі. Гэта не толькі прыгожа і модна, але і зручна".
Пакупнікі Беларусі і Расіі ўжо ацанілі арыгінальнасць такіх камплектаў адзення. Уся лінейка віцебскіх вытворцаў шырока прапанаваная ў гандлёвай сетцы. У дзяцей і бацькоў ёсць выбар - штаны, пінжакі, кашулі. Кожны падбярэ на свой густ. У буйным універмагу Віцебска толькі школьнай формы больш за семдзясят мадэляў.
Сямігадовы Дзіма Шчур сёлета пойдзе ў першы клас. Для сям'і доўгачаканая падзея. Таму набыццё школьных прылад і формы не сталі адкладваць. З радасцю выбіраюць ранец, пенал, сшыткі. Ну і, вядома ж, касцюм. Першакласнік павінен выглядаць адпаведна новаму статусу.
Алоўкі, ручкі, лінейкі… Пашыраны распродаж школьных прылад у Віцебскай вобласці пачаўся яшчэ ў сярэдзіне ліпеня. Для зручнасці пакупнікоў працуюць больш за тысячу куткоў для школьнікаў.
Напярэдадні Дня ведаў, 15 і 22 жніўня, у Віцебскай вобласці будуць працаваць больш за дзевяноста школьных кірмашоў. Кірмашы здзівяць шырокім асартыментам і зніжкамі, каб новы навучальны год быў на радасць і школьнікам, і іх бацькам.
