Маладзёжная фабрыка палітычнай, эканамічнай і сацыяльнай думкі ў анлайн і афлайн-фармаце, г. зн. у Глабальнай павуціне і рэальным жыцці створана і актыўна развіваецца ў Беларусі. Сёння прайшла першая рэспубліканская канферэнцыя інтэлектуальнай супольнасці Разумныя сеткі. Паўтары сотні палітолагаў, сацыёлагаў, эканамістаў і студэнтаў старэйшых курсаў аб'яднала імкненне ўключыцца ў праект мадэрнізацыі Беларусі, данесці свае наватарскія ідэі і выбудаваць кар'еру паспяховых экспертаў. Клубу маладых аналітыкаў усяго год, але вынікі іх працы ўжо адчувае і грамадства, і вертыкаль улады.
Як працуе новая беларуская фабрыка думкі і колькі крэатыўнай моладзі неабходна для якаснай мадэрнізацыі краіны, ведае Андрэй Крывашэеў.
Праект Разумныя сеткі, створаны год таму па ініцыятыве Адміністрацыі Прэзідэнта, ужо перарос маладзёжны фармат і стаў фабрыкай думкі. І па-сапраўднаму таленавітую аналітыку ўжо ацанілі кіраванцы. Фармат сеткі з віртуальнай групы на семінарах і трэнінгах удалося сабраць у паўнавартасны інтэлектуальны штаб.
Павел Кудраўцаў, удзельнік праекта Разумныя сеткі: Разумныя сеткі першапачаткова задумвалася як праграма для тых людзей, для якіх палітычная аналітыка з'яўляецца не проста цікавасцю, не проста хобі, а менавіта запалам.
Разумныя сеткі ўвабралі ў сябе ўсе бонусы анлайн-камунікацый. З плюсаў: адкрытасць віртуальнай прасторы і дыскусіі, магчымасць мазгавога штурму з любога пункта краіны праз Сетку, шматмільённая аўдыторыя і поўная свабода думкі. Пры гэтым ніякага зласлівага тролінгу і сеткавага хамства, агульная мэта і канкрэтныя задачы аналізу, навуковасць і аўтарытэт вядучых ВНУ краіны, чые выпускнікі і студэнты біліся над рашэннем праекта.
Аляксей Мацавіла, намеснік дырэктара Інфармацыйна-аналітычнага цэнтра пры Адміністрацыі Прэзідэнта Беларусі: У нас больш за 130 тысяч маладых людзей, якія патэнцыйна гатовыя ўдзельнічаць у нацыянальных мадэрнізацыйных праектах. Гэта вялізны патэнцыял, якім дзяржаве трэба ўмела распарадзіцца, падабраўшы механізмы, новыя інструменты для ўцягвання гэтай моладзі ў працэс мадэрнізацыі, у працэс дзяржаўнага будаўніцтва.
Першым сур'ёзным выпрабаваннем для праекта стала падрыхтоўка тэзісаў да Паслання Прэзідэнта народу і парламенту. Над тэзісамі працавалі некалькі месяцаў, але вытрымалі выпрабаванне бліскуча. У Пасланні прагучала: Беларусі патрэбная не проста мадэрнізацыя і новыя інфармацыйныя тэхналогіі, патрэбная крэатыўная моладзь, якая пацягне амбіцыйны праект Беларусі XXI стагоддзя.
Уладзімір Сцяпанаў, вядучы спецыяліст ІАЦ пры Адміністрацыі Прэзідэнта Рэспублікі Беларусь: Хлопцы справіліся добра, працавала некалькі груп. Было шмат спрэчак, прапаноў. Тыя тэзісы, якія атрымаліся, выкарыстоўваліся, і праца аналітыкаў не пайшла ў пустую. Я думаю, што выказванні Прэзідэнта аб моладзі, аб неабходнасці інфарматызацыі - гэта тое, што шмат у чым ад яго чакае большая частка беларускай моладзі. І дзякуючы праекту Разумныя сеткі яна атрымала магчымасць выказаць свае спадзяванні.
Праект Разумныя сеткі - гэта яшчэ і сацыяльны ліфт для крэатыўнай моладзі да 35 гадоў. Шанц не проста заявіць пазіцыю, а стаць афіцыйным экспертам дзяржорганаў усіх узроўняў. Рэалізаваная мара палітолага і сацыёлага - гэта калі твая ідэя змяняе падыходы, законы і грамадскія настроі. Тры ўдзельнікі групы ўжо на дзяржслужбе, і гэта не мяжа, а першы крок да амаладжэння экспертнай супольнасці.
Віктар Якжык, намеснік Міністра адукацыі Рэспублікі Беларусь: Амаладжэнне аналітычных кадраў і амаладжэнне кіраўнічых кадраў, ну і ў такой, можа, нябачнай працы, як аналітычнае і стратэгічнае планаванне, таксама патрэбныя сучасныя падыходы. Як раз тыя людзі, якія ўцягнутыя ў праект, прайшлі адбор і здольныя ўнесці свій уклад у глабальныя пытанні дзяржаўнага будаўніцтва.
Першы выхад маладзёжнай лабараторыі думкі з сацыяльнага і грамадзянскага ценю аказаўся нават больш прадуктыўным, чым меркавалі арганізатары. 25 паўнавартасных праектаў па тэмах ад рэформы дзяржапарату да знешняй і маладзёжнай палітыкі. Дэдлайнам для сябе маладыя аналітыкі назвалі 2015 год. Гэта значыць яшчэ паўтара года, каб сабраць і адшліфаваць ідэі ў суцэльную канцэпцыю новай Беларусі.
