Самае відовішчнае мерапрыемства, прысвечанае дню нараджэння легендарнай амерыканскай маркі. Пачнецца грандыёзны фэст 13 чэрвеня, і ў рэжыме нон-стоп - тры дні. Упершыню ў такім маштабным свяце возьмуць удзел і прыхільнікі найстарэйшага брэнда ад нашай краіны. Харлеі з беларускімі нумарамі ўзялі курс на Рым яшчэ напярэдадні і ўжо паспелі вытрымаць першае выпрабаванне.
Кацярына Бірэцкая ведае ўсе падрабязнасці.
Першыя матацыклы прыпаркаваліся на пляцоўцы ў цэнтры сталіцы дзесьці за паўгадзіны да прызначанага часу. Ледзь пазней высветлілася: загадзя прыбылі не тыя, хто збіраецца ўзяць курс на Рым, а тыя, каму трэба ўрачыста - гэта традыцыя - праводзіць беларускую байк-дэлегацыю і, больш за тое, зрабіць усё магчымае, каб Мінск у найбліжэйшыя дзесяць дзён не засумаваў па гудзе матацыклаў.
Пра тое, што гэтае падарожжа адбудзецца, прыхільнікі легендарнай маркі з Беларусі ведалі яшчэ летась. Падрабязны маршрут распрацавалі ўжо ў лютым. Увогуле ім трэба праехаць парадку 6 тысяч кіламетраў.
А ўсё для таго, каб упершыню ў гісторыі ў шматтысячнай калоне байкераў з усяго свету па цэнтральных вуліцах Рыма пранесліся і матацыклы з беларускімі нумарамі.
Грандыёзны байк-парад - толькі адно з сотні мерапрыемстваў. 110-ы дзень нараджэння легендарнага брэнда Харлі Дэвідсан свет будзе адзначаць у італьянскай сталіцы тры дні адначасова на некалькіх пляцоўках у рэжыме нон-стоп.
Вырашылі не прапускаць гэтую падзею і сем'і беларускіх байкераў. Жонкі і нават дзеці - у дзвюх машынах суправаджэння. Прамяняць камфорт на адчуванне волі першапачаткова цвёрда вырашыла толькі адна дзяўчына.
Не пашкадавала Ніка аб сваім рашэнні, нават нягледзячы на праліўны дождж, які абрынуўся на беларускую байк-дэлегацыю ўжо праз пару гадзін пасля пачатку падарожжа.
І, тым не менш, у Брэсце - гэта быў першы прыпынак - усе ў літаральным сэнсе з вады выйшлі практычна сухімі.
Трохі часу на сон, а раніцай ізноў у дарогу. Наступны прыпынак - Патсдам. Потым Аўстрыя і, нарэшце, Італія. Байкеры з Беларусі прыбудуць у Рым 13 чэрвеня як раз да афіцыйнага адкрыцця грандыёзнага міжнароднага фэсту. Свята, якое чарговы раз пацвердзіць фразу, народжаную разам з легендарнай маркай матацыклаў: ты ніколі не будзеш катацца адзін.
