Ад Палаца спорту да Лошыцкага парку. Эстафета святочных мерапрыемстваў стартавала адразу пасля цырымоніі ўскладання вянкоў да манумента Перамогі. Ужо можна гаварыць пра тое, што гэтае свята Перамогі, верагодна, стане рэкордным па колькасці чалавек, якія наведалі ўрачыстасці ў сталіцы. Дакладная лічба будзе вядомая заўтра, але тое, што мільённы паказчык мінулага года пабіты, ужо і так зразумела. Спрыялі таму выдатнае надвор'е і ўрачыстая атмасфера, што панавала ва ўсіх парках і скверах Мінска. Варта сказаць, што арганізатары святочных пляцовак пастараліся дагадзіць усім гасцям: і дзецям, і дарослым. Напрыклад, у парку Чалюскінцаў маленькія беларусы маглі пракаціцца па ўнікальным маршруце, арганізаваным на дзіцячай чыгунцы. А ў парк Перамогі сцягнуліся аматары спорту, там адбыўся забег адважных. Святочная карціна 9 Мая ў сюжэце Юрыя Шаўчука.
Пасля ўрачыстага ўскладання вянкоў да манумента Перамогі паркі і скверы сталіцы расчынілі дзверы для гасцей. Людзі разышліся па святочных пляцоўках. Традыцыйна, больш за ўсё наведвальнікаў сабралася ля Палаца спорту. Тут беларусаў чакаў святочны канцэрт і шмат сюрпрызаў ад арганізатараў: горад майстроў, спартыўныя флешмобы і нават спаборніцтвы па сілавым экстрыме.
Прыхільнікі здаровага ладу жыцця ў прамым сэнсе слова прыбеглі ў парк Перамогі. Тут адбыўся ўсебеларускі забег адважных - у лёгкаатлетычным марафоне прынялі ўдзел каля 800 чалавек. Два кіламетры пад аглушальныя выбухі па траве або па пояс у вадзе з 15-кілаграмовымі мяшкамі на плечах і прабіраючыся скрозь падвешаныя шыны. На самых складаных перашкодах мужчыны з задавальненнем дапамагалі дзяўчатам, а балельшчыкі падбадзёрвалі бегуноў. На фінішы кожны ўдзельнік атрымаў памятны медаль.
Канцэрт, прысвечаны новаму турыстычнаму сезону, прайшоў у Верхнім горадзе. Песні, музыка і танцы сталі неад'емнымі атрыбутамі гэтай мясціны.
Дзе адпачыць з дзіцем, сёння пытання ні ў каго не ўзнікала. Парк Горкага. Цэнтральны дзіцячы парк апраўдаў сваю назву поўнасцю. Горкі, пракат машынак, марожанае, цукровая вата і, вядома, атракцыёны. Сем'ям для прагулак такая пляцоўка падышла як нельга лепш. Тут разгарнулася і творчая майстэрня. Можна было набыць сувеніры народных умельцаў і нават сімвалічную ваенную амуніцыю. Менавіта тут прагучалі першыя мелодыі святочнага канцэрта пад назвай "Быў май - была Перамога".
Незвычайны маршрут па дзіцячай чыгунцы маленькіх пасажыраў чакаў сёння ў парку Чалюскінцаў. Святочны склад адправіўся са станцыі Заслонава. Але парадавала дзіцячая чыгунка самых маленькіх беларусаў не толькі падарожжам, а і канцэртам. На сцэне выступілі юныя вакалісты.
Варта было прайсці літаральна 500 метраў ад дзіцячай чыгункі, як мінчан і гасцей сталіцы зачароўвала ўнікальная атмасфера Батанічнага саду. Гэта выдатны ландшафт, удзел у акцыі "Кветкі героям Перамогі".
Варта сказаць, што атмасфера ўсеагульнага свята цалкам захапіла горад. Напрыклад, у Лошыцкім парку можна было адправіць ліст ветэрану. Кожны, хто жадаў, пісаў словы падзякі. Адрасатамі сталі беларускія ветэраны.
Асобную ўвага варта надаць надвор'ю, якое камандавала парадам адпачывальнікаў на працягу ўсяго дня. Сонца і бясхмарнае неба аддавалі каманду выходзіць на прагулку - мінчане і госці сталіцы былі не супраць. Таму сёння ў парках і скверах Мінска літаральна яблыку не было дзе ўпасці.
80 пунктаў - менавіта столькі мясцін сёння сабралі гасцей у Мінску. Паводле самых сціплых падлікаў, адсвяткаваць Дзень Перамогі на вуліцы сталіцы выйшлі больш за мільён чалавек. Ужо з упэўненасцю можна сказаць, што рэкорд мінулых гадоў пабіты.
