Ад сярэдневяковых турніраў да моташоу. Дзясяткі святочных лакацый разгорнуцца ў сталіцы

14 Верасня 2019

Шумна, музычна і па-спартыўнаму з запалам сёння будзе ў розных кутках сталіцы. Мінску - 952! 

У Дзень горада паводле традыцыі разгорнуцца дзясяткі святочных лакацый. Праграма самая разнастайная - ад дзіджэй-батлаў і сярэдневяковых турніраў да моташоу і нават забегаў на абцасах. Так што кожны зможа знайсці актыўнасці па душы. 

На працягу дня нашы карэспандэнты будуць працаваць ва ўсіх кутках Мінска. А зараз аб самых яркіх падзеях святочнай афішы раскажа Аляксандра Кавеліч.

На гэтай пляцоўцы на праспекце Пераможцаў госці ўжо хутка змогуць адправіцца ў мінулае. Літаральна праз дзве гадзіны тут будуць грукатаць рыцарскія даспехі і гучаць мелодыі трубадураў. Фестываль гістарычнай рэканструкцыі, ужо традыцыйна адна з самых яркіх падзей Дня горада,  гэтым разам збярэ ўдзельнікаў з усёй Еўропы і не толькі.

Конныя турніры, спаборніцтвы лучнікаў і нават штурм замка. Усе дзевяць стагоддзяў гісторыі Мінска будуць увасабляць рэканструктары, рамеснікі і музыканты. 

Такія дэкарацыі з'явіліся напярэдадні ля Палаца спорту - ратавальнікі з 8 краін спаборнічаюць за званне наймацнейшага і спрытнага. Побач - вялікі мотафестываль. Яго ўдзельнікі - а гэта 8 тысяч байкераў - пройдуць сюды калонай ад Кургана Славы. 

Дзясяткі святочных лакацый разгорнуцца ва ўсіх раёнах сталіцы. Ад гонак па гарадскіх вуліцах у мікрараёне Чыжоўка да замалёвак вулічных тэатраў і музычных батлаў у Верхнім горадзе. 

Віншаваць Мінск, прычым на розных мовах, будуць і ля Ратушы. Відэаадкрыткі з пажаданнямі змогуць запісаць госці свята. А вечарам тут выступяць артысты Музычнага тэатра. 

Дарэчы, для зручнасці жыхароў грамадскі транспарт сёння будзе хадзіць часцей. Скароцяць і інтэрвалы чакання ў метро. Так што нішто не перашкодзіць далучыцца да вялікага гарадскога свята і павіншаваць Мінск з днём нараджэння.