Гэта было нядаўна, гэта было даўно. Да 70-годдзя Перамогі ў Вялікай Айчыннай застаецца 64 дні. Чым не падстава яшчэ раз успомніць пра тых, хто гэты дзень набліжаў, як мог. Ён дайшоў да Берліна і пакінуў на Рэйхстагу свой аўтограф. Адзіны на сёння ў Беларусі кавалер адразу трох ордэнаў Славы Віктар Вітошкін. Згодна з афіцыйным статусам, гэта ўзнагарода прыраўнавана да звання Героя Савецкага Саюза. Пра тое, як ваяваў заслужаны франтавік, якія перамогі ён атрымліваў ужо ў мірны час - рэпартаж Руслана Туркова.
Ён ішоў на Берлін, абганяючы свае ўзнагароды на гады. Адзіны з тых, хто зараз жыве ў Беларусі, кавалер трох ордэнаў Славы Віктар Вітошкін большую частку з іх атрымаў ужо ў мірны час.
Тады было не да гэтых "цацак", жартуе ветэран, подзвігі на вайне яны не лічылі. Свае 20 гадоў ён сустрэў 11 мая 1945 года ля сцен Рэйхстага і нават пакінуў там аўтограф.
Віктар Вітошкін вызваляў Беларусь, Прыбалтыку, Польшчу і штурмаваў Берлін. Два ордэны Славы атрымаў за пераправу на Одэры і Вісле. Пра трэцюю ўзнагароду даведаўся амаль праз 30 гадоў. Стаўшы поўным кавалерам, прыраўнаваўся да звання Героя Савецкага Саюза.
У 43-м годзе вучань чыгуначнага вучылішча Віктар Вітошкін змяніў парту на салдацкія акопы. Гаворыць, ваенкамат спачатку ў павестцы адмовіў, але настойлівасць будучага героя ўзяла верх. Праз месяц першае баявое хрышчэнне мінамётчыка Вітошкіна і першы медаль "За адвагу" ў баях на Дняпры пад Магілёвам.
Ён не марыў аб узнагародах, яны самі яго заўсёды знаходзілі. У сярэдзіне 70-ых на фабрыцы "Палесдрук", дзе ўсё жыццё і прапрацаваў, Віктар Вітошкін прапаноўвае перайсці на афсетны друк - прарыў у той час. У выніку баявая калекцыя папаўняецца ўжо мірнай узнагародай - ордэн Леніна. Сёння герой вайны жыве ў Мінску. Кватэра ў прэстыжным раёне горада - вынік сацыяльнай дапамогі дзяржавы заслужанаму франтавіку. Узнагарода адважных любіць, жартуе ветэран і тут жа дадае, а яшчэ і ўдача, якая правяла яго праз усю вайну.
