Адна на матацыкле вакол свету! Упершыню ў нашай гісторыі беларуска адправіцца ў адзіночнае мотавандраванне па ўсіх правілах. У планах адважнай дзяўчыны Кацярыны Дубаневіч праехаць 100 тысяч кіламетраў і наведаць парадку 50 краін свету. Падарожжа зойме паўтара года і пачнецца ўжо 18 жніўня. Аб падрыхтоўцы да няпростага маршруту і аб тым, чаму так важна ісці да сваёй мары, і як яна збіраецца прэзентаваць Беларусь, дзяўчына распавяла падчас анлайн-канферэнцыі на сайце Белтэлерадыёкампаніі.
Гэта не першае мотавандраванне дзяўчыны ў адзіночку. Пад хэштэгам "Каця коціць" адважная беларуска рэгулярна размяшчае справаздачы з сваіх паездак. А гэтым разам ахвочыя змогуць назіраць за перамяшчэннямі матацыклісткі анлайн пры дапамозе спадарожнікавага трэкера. Пажадаем Кацярыне поспеху і роўных дарог! А падрабязную тэкставую версію і відэатрансляцыю канферэнцыі можна знайсці на сайце tvr.by, YouTube-канале і ў сацыяльных сетках Агенцтва тэленавін.
