Аглядную экскурсію па Мінску на новым відзе транспарту сёння правялі для прадстаўнікоў дыпмісій у Беларусі. Замежныя госці ацанілі не толькі якасць і вонкавы выгляд электробусаў, але і бяспеку, і экалагічнасць такога віду транспарту. Не выключана, што вынікам сустрэчы могуць стаць рэальныя кантракты на пастаўку гэтых машын за мяжу. Антаніна Станкевіч працягне.
Кароткая прэзентацыя - і толькі факты. Аб'ём акумулятара, час паміж падзарадкамі, тэрмін службы і ёмістасць транспарту. А пасля - экскурсія па цэху, дзе з канвеера ўжо сышлі першыя электробусы "мэйд ін Беларус". Ужо праз два месяцы ў тэставым рэжыме новы транспарт будзе курсіраваць па сталічных вуліцах. Аднак вытворца арыентаваны, у тым ліку, і на экспарт. Таму прадугледзелі ўсе тэхнічныя моманты. Акрамя таго, з улікам спецыфікі рэгіёна-партнёра любую мадэль можна змяніць у кароткія тэрміны.
А тым часам на вуліцы ўжо стаіць гатовы да паездкі электробус. Дарэчы, мінскія пасажыры пазнаюць новы від транспарту па абцякальных формах і жоўтым колеры - такі вынік народнага галасавання ў Інтэрнэце. Для паставак за мяжу транспарт могуць выканаць у любой расфарбоўцы. Госці ацэньваюць не толькі дробязі накшталт разетак, usb-раздымаў і сістэмы відэаназірання ў салоне. У першую чаргу - упор на бяспеку і экалогію.
Алірэза Сейхун, гандлёвы аташэ пасольства Ірана ў Беларусі: "У Іране шмат гарадоў-мільёншчыкаў, і вялікая доля асабістага аўтатранспарту. А гэты праект нам вельмі цікавы, у першую чаргу з экалагічнага пункта гледжання".
Маршрут складзены такім чынам, каб госці ацанілі і хадавыя якасці транспарту. Уздымы, ухілы і павароты электробус праходзіць плыўна, лёгка і бяспечна.
Электробус праехаў па вуліцы Радыяльнай, Партызанскім праспекце, плошчы Ванеева і зноў Радыяльная - а гэта без малога 10 кіламетраў. І можа праехаць як мінімум яшчэ столькі ж. Для таго каб цалкам папоўніць батарэю, спатрэбіцца ўсяго 5-7 хвілін.
Электробусы - гэта новы трэнд у грамадскім транспарце для буйных гарадоў. Такія машыны ўжо калясяць па сталіцах Заходняй і Усходняй Еўропы, а таксама ў Кітаі, Японіі, Паўднёвай Карэі. Іх кошт параўнальны з тымі ж аўтобусамі 6-га пакалення або машынамі, якія працуюць на біяпаліве, аднак яны не даюць шкодных выкідаў у атмасферу і не патрабуюць будаўніцтва складанай інфраструктуры.
Такія сустрэчы спрыяюць заключэнню рэальных кантрактаў на пастаўку тэхнікі ў розныя краіны - перакананыя на прадпрыемстве. Тым больш што тралейбусы і трамваі, якія тут вырабляюць, ужо добра зарэкамендавалі сябе ў Сербіі, Латвіі, Малдове і Бразіліі, не гаворачы ўжо аб найбліжэйшых суседзях. Так што, не выключана, што перавозіць пасажыраў у розных гарадах свету неўзабаве будуць і беларускія электробусы.
