І яшчэ аб праблемах, якія часам патрабуюць асаблівай увагі і прынцыповых дзеянняў. Каля 3 тысяч чалавек скарысталіся "Зваротнай сувяззю" напярэдадні "Вялікай размовы з Прэзідэнтам". Сярод іх і жыхары Пінска. Тут паўтары сотні спартсменаў і проста аматараў тэніса трэніруюцца ў адзінай зале, якая, дарэчы, не адпавядае ніякім сучасным патрабаванням. І гэта прытым, што менавіта юныя тэнісісты Пінска складаюць касцяк зборнай вобласці. Пытанне будаўніцтва крытых кортаў, дзе займацца можна круглы год, трэнеры і бацькі паднімалі не раз. З гэтай жа праблемай яны звярнуліся да Кіраўніка дзяржавы. Сітуацыю на кантроль узялі і мы. Як вырашаецца гэтае пытанне - у нашай рубрыцы "Зваротная сувязь".
Расказвае Вікторыя Патоня. Актыўны сезон трэніровак на летніх кортах у Пінску адкрыецца ў лепшым выпадку ў канцы красавіка. А пакуль большасць аматараў гэтага віду спорту не спяшаюцца расчахляць ракеткі. Юрый Кананчук захапіўся тэнісам пасля 30. І такіх, як ён, у Пінску паўсотні, але няма прыдатнай базы, дзе можна займацца круглы год. Хіба што ўначы! І прафесіяналы, і аматары ўзімку дзеляць вось гэтую адзіную на ўвесь горад крытую тэнісную пляцоўку. І гэта прытым, што менавіта Пінск з'яўляецца цэнтрам развіцця тэніса ў рэгіёне, летам тут праходзяць міжнародныя і еўрапейскія турніры. Касцяк зборнай вобласці - юнакі і дзяўчаты са спецыялізаванай школы. У зале замест 4 чалавек трэніруюцца ў 3 разы больш.
Цесната - не адзіны мінус гэтай залы. Паводле слоў спецыялістаў, пакрыццё даўно не адпавядае сучасным патрабаванням. Разгарнуцца здольным вучням сапраўды няма дзе. Праблема абмяркоўваецца некалькі гадоў, але далей за гутарку справа не рухаецца. У беларускай тэніснай федэрацыі пацвярджаюць: будаваць у Пінску можна, вядома, з падтрымкай фундатараў. І расстаўляюць акцэнты: спачатку крытыя тэнісныя корты ўзвядуць у абласных цэнтрах, а толькі потым - у раённых гарадах.
Дарэчы, новы тэнісны цэнтр уключылі ў план развіцця Пінска да 2020 года. Мясцовыя ўлады ідэю падтрымліваюць, але гэта доўгатэрміновая перспектыва. Зямлю пад новы аб'ект вызначылі, але канкрэтнага праекта пакуль няма. Мяркуецца, што крыты тэнісны манеж будзе пабудаваны на месцы былога гарадскога стадыёна "Прыпяць". Раней тут займаліся лёгкаатлеты і футбалісты, зараз участак не задзейнічаны. Гараджане спадзяюцца, што новы спартыўны аб'ект будзе запатрабаваны, бо месца выбрана ўдалае - цэнтр горада.
Каб канчаткова вырашыць, якім будзе тэнісны цэнтр, мясцовыя ўлады і федэрацыя павінны аб'яднаць намаганні. Верагодна, выразнае рашэнне з'явіцца ў найбліжэйшы месяц падчас запланаванай працоўнай сустрэчы.
