Новы цэнтр дыягностыкі анкалагічных захворванняў з'явіцца ў Беларусі ў наступным годзе

Спецыяльныя тамографы ўсталююць у Рэспубліканскім навукова-практычным цэнтры анкалогіі і медыцынскай радыялогіі. Яны дазволяць разгледзець нават найменшыя новаўтварэнні, а, значыць, пачаць лячэнне раней і павялічыць шанцы пацыента. Да гэтага такіх даследаванняў у нашай краіне не праводзілі. Гэтую лабараторыю можам пабудаваць і мы з вамі. Для гэтага трэба проста выйсці на суботнік - усе сродкі, якія будуць заробленыя заўтра, накіруюць менавіта ў гэты навукова-практычны цэнтр у Бараўлянах.

Ксенія Рабчынская - пра тое, што даражэй за грошы.

Сагідула Жумыраў даведаўся пра сваю хваробу толькі ў пачатку сакавіка. Рак прагрэсіраваў. У Казахстане, на радзіме, яму адразу ж параілі паехаць у Беларусь.
30 гадоў назад Сагідула ў Беларусі служыў - сёння сюды разам з ім прыехала сястра і жонка. Складаную аперацыю хірург Аляксандр Оспішчаў праводзіў 7 гадзін. Замежных пацыентаў толькі летась у навукова-практычны цэнтр паступіла паўтары тысячы - на экспарце медыцынскіх паслуг РНПЦ зарабіў 2 мільёны долараў.

Аляксандр Оспішчаў, урач-анколаг-хірург ГУ РНПЦ анкалогіі і медыцынскай радыялогіі імя М.М.Аляксандрава: Дзякуючы актыўнай палітыцы нашага цэнтра пра нас ведаюць, можна сказаць, ва ўсім свеце. Пацыенты прыязджаюць не толькі з СНД, але і з іншых краін.

Сёння ў цэнтры адначасова знаходзіцца 820 пацыентаў, тут праводзяць і дыягностыку, і лечаць абсалютна ўсе анкалагічныя захворванні. Нядаўна адкрылася нейрахірургічнае аддзяленне. Але дыягнаставаць ракавыя ўтварэнні памерам усяго - 1 міліметр - па-ранейшаму вельмі складана, гэтак жа, як і даследаваць метастазы. Але ўжо зусім хутка тут з'явіцца спецыяльная лабараторыя. Усе сродкі, якія заўтра заробім мы з вамі на суботніку, будуць накіраваныя на будаўніцтва новага цэнтра тамаграфіі.

Віктар Кахнюк, намеснік дырэктара па хірургіі ДУ РНПЦ анкалогіі і медыцынскай радыялогіі імя М.М.Аляксандрава: Пазітронна-эмісійная тамаграфія будзе прымяняцца для ўдакладняючай дыягностыкі, для таго, каб удакладніць, наколькі пухліна распаўсюджана па арганізме, а значыць, выбраць правільную схему лячэння.

Больш за тое, калі на пачатковым этапе падрабязна даследаваць нават самыя маленькія ўтварэнні, лячэнне будзе больш эфектыўным і ў пацыента больш шанцаў на рэмісію захворвання. Да гэтага тыя, каму была неабходная такая тамаграфія, ездзілі за мяжу - хутка, спадзяюцца медыкі, прыязджаць для правядзення даследаванняў пацыенты будуць ужо да нас.

Плануецца, што цэнтр расчыніць дзверы для першых пацыентаў у пачатку наступнага года. На яго будаўніцтва ўжо выдаткавана больш за 100 мільярдаў рублёў. Тут размесціцца адразу тры сучасныя тамографы, у перспектыве такое абсталяванне, магчыма, з'явіцца і ў рэгіёнах.

Ні адзін з метадаў даследаванняў: ультрагукавы, эндаскапія і нават рэнтген, такога падрабязнага выніку, як пазітронна-эмісійная тамаграфія прадаставіць не можа. А значыць, новы цэнтр дыягностыкі анкалагічных захворванняў дапаможа выратаваць нават не сотні, тысячы жыццяў.