Новы транспартна-лагістычны цэнтр
Новы транспартна-лагістычны цэнтр прымыкае непасрэдна да памежнага пункта пропуску "Бераставіца-Баброўнікі". Зараз перавозчыкам, каб аформіць транзітны груз, няма неабходнасці заязджаць на тэрыторыю Рэспублікі Беларусь. А гэта ў канчатковым выніку эканоміць час і грошы.Сёння ў распараджэнні грузаперавозчыкаў складскія памяшканні агульнай плошчай больш за 5 тысяч квадратных метраў, адміністрацыйна-бытавы комплекс, стаянкі для легкавога і грузавога транспарту. Тут будуць аказваць паслугі мытнага афармлення, фітасанітарнага і ветэрынарнага кантролю. На ўсе працэдуры - не больш за гадзіну.
Андрэй Мотуз, намеснік дырэктара прадпрыемства па лагістыцы: "Усё адбываецца аўтаматычна. Ад моманту заезду да моманту афармлення адпаведна 10-15 хвілін. Пасля гэтага ў працу ўступаюць мытныя прадстаўнікі і на працягу 45 хвілін праходзіць афармленне грузаў. І транспартны сродак можа пакінуць тэрыторыю транспартна-лагістычнага цэнтра".
Спрошчаная працэдура мытнага афармлення
Раней для грузу, які ідзе ў Беларусь, яшчэ на мяжы адкрывалася працэдура мытнага транзіту. Яна паўтаралася на ўнутраных пунктах афармлення. Зараз гэтае звяно мытнага транзіту цалкам выключаецца.Юрый Сянько, старшыня Дзяржаўнага мытнага камітэта Беларусі: "У памежным пункце мытнага афармлення фактычна будуць аказвацца ўсе паслугі для адпраўшчыка. І далей перавозчык можа даставіць груз у любы пункт нашай краіны, і ўжо не падвяргацца якім-небудзь відам кантролю па шляху, у пунктах прызначэння і гэтак далей".
Гродзенская вобласць - прывабны транзітны рэгіён
У Гродзенскай вобласці гэта ўжо трэці транспартна-лагістычны цэнтр на мяжы з Еўрасаюзам. Што робіць рэгіён прывабным для транзітных грузаў. А дзякуючы развіццю дарожнай сеткі, лагістыка ўжо стала адной з кропак эканамічнага росту рэгіёна.Алена Бубенчык, намстаршыні Гродзенскага аблвыканкама: "Мы маем найбольшую колькасць міжнародных пунктаў пераходу, у нас добрыя, пасля ўвядзення ў строй М6, транспартныя зносіны. Гэта камфортнае знаходжанне, перамяшчэнне аўтатранспартных сродкаў на нашых міжнародных калідорах, якія праходзяць па Гродзенскай вобласці. Ну а ўвядзенне такіх аб'ектаў у эксплуатацыю, безумоўна, будзе спрыяць развіццю гэтай сферы".
У найбліжэйшых планах - стварыць у Гродзенскай вобласці нараўне з аўтамабільнымі, яшчэ і чыгуначныя лагістычныя цэнтры. Гэта дазволіць забяспечыць камфортны транзіт усіх грузаў, якія перамяшчаюцца з тэрыторыі Еўрапейскага саюза.
