Новыя аб'екты аховы здароўя ўзвядуць у Мінскім раёне

Новыя аб'екты аховы здароўя з'явяцца на карце Мінскага раёна. У Заслаўі пабудуюць паліклініку і бальніцу. Старыя будынкі, дзе зараз аказваюць медыцынскую дапамогу, не могуць змясціць усіх пацыентаў. Новыя аб'екты поўнасцю вырашаць гэтую праблему. Месцы для будаўніцтва ўжо вызначаны. Хутка пачнуць праектныя работы.

Не менш востра медыцынскае пытанне стаіць у Бараўлянах. Там таксама пабудуюць новую паліклініку. Ужо аднавілі мясцовую бальніцу  - з'явіўся новы корпус, у якім адкрылі профільныя медыцынскія аддзяленні. Акрамя таго, зараз праектуюць новую паліклініку ў вёсцы Азярцо, а таксама ў Копішчы. Пачалі будаўніцтва і амбулаторыі ў Хацежыне. Пакуль там працуе толькі  фельчарскі пункт.