Беларускі фермер таксама адкрывае новыя гарызонты! Многія не здагадваюцца, як вырасціць ураджай без мінеральных угнаенняў або дадатковай апрацоўкі. Бо гэта першыя памочнікі на градках, скажуць шматлікія дачнікі. Аднак ёсць і тыя, хто не прымае ніякай хіміі і сцвярджае: па-сапраўднаму адказная справа немагчымая без клопату аб прыродзе і здароўі.
Прыхільнікаў здаровага ладу жыцця становіцца больш. Гэта факт! Расце попыт на здаровае харчаванне. І тыя, хто апрацоўвае зямлю, пачынаюць беражліва да яе ставіцца. Пакуль адзінкава. Але рух набірае абароты.
Ва ўсім свеце плошчы земляў, сертыфікаваных для вытворчасці арганічнай прадукцыі, за апошняе дзесяцігоддзе выраслі ўдвая. Двухразова прыраслі продажы экапрадуктаў. Ёмістасць сусветнага рынку пад іх зараз - каля 90 мільярдаў долараў. І лічба стабільна расце. Штогод як мінімум на 10 %.
Ці можа Беларусь стаць яго неад'емнай часткай і прапанаваць свой унікальны экапрадукт, які б стаў новым брэндам нашай краіны? Колькі беларускіх фермераў далучыліся да зялёных тэхналогій? І чаму арганічную прадукцыю пад нашай маркай на прылаўках – на жаль! - не знайсці?
А таксама чым фермеру дапаможа новы закон аб арганіцы? І ці падкажа ён пакупніку, як адрозніць сапраўдны эка ад псеўда? Новая серыя праекта "На кантролі Прэзідэнта" - "Экалагічна чыстыя прадукты" - у сераду ўвечар пасля "Панарамы".
