Дзясяткі самабытных, традыцыйных і аўтарскіх страў аб'яднаў Тыдзень беларускай кухні. Гастранамічны праект падтрымалі больш за 30 кафэ і рэстаранаў. Раней удзельнікі гатавалі аднолькавыя стравы. На гэты раз фармат смачнага фестывалю абнавілі. Усіх аб'яднала Масленіца - у меню абавязкова бліны. А вось астатнія стравы – аўтарскія – ад шэф-повараў.
Хтосьці робіць акцэнт на блінах з рознай начынкай, хтосьці рыхтуе асаблівае аўтарскае меню, а хтосьці здзіўляе падачай традыцыйных беларускіх страў. Напрыклад, як тут. Вось боршч па-беларуску з вэнджанай грудзінкай і гарачая патэльня з курыцай і лісічкамі.
А яшчэ - бліны з падліўкай з журавін і пятрушнік на бярозавіку. Такі мега-сэт вагой паўтара кілаграма распрацаваў шэф-повар Андрэй Сандалаў. У кулінарнай сферы ён працуе больш за 15 гадоў. І ведае: стравы павінны быць простымі і каларытнымі. Таму і гэтым разам эксперыментуе. Звыклыя стравы набываюць свежыя гастранамічныя ноты.
Бліны ў кожным кулінарным сэце
Тыдзень беларускай кухні супаў з масленічным марафонам, таму бліны ёсць у кожным комплексе. Гарбузовыя наліснікі, шпінатавыя аладкі, тварожныя пампушкі і бургер-дранікі.
Абавязковая ўмова гастранамічнага фестывалю – адзіны кошт. Так і гэты раз. Набыць сэт у розных кафэ і рэстаранах можна за 20 рублёў.
За лепшы сэт можна прагаласаваць
У сталіцы тыдзень беларускай кухні праходзіць ужо дваццаць першы раз. Спіс кафэ і рэстаранаў, дзе можна пакаштаваць беларускія стравы, размешчаны на сайце галоўнага ўпраўлення спажывецкага рынку Мінгарвыканкама. Дарэчы, там жа ідзе галасаванне за лепшы сэт.
