Ці гатова Беларусь да наплыву турыстаў - адна з самых абмяркоўваемых тэм перад стартам ІІ Еўрапейскіх гульняў. Чакаецца, што нашу краіну наведае больш за 30 тысяч гасцей з 50 краін свету. І натуральна, спартсменаў і балельшчыкаў трэба будзе сустрэць, рассяліць і накарміць. Задача не з простых, зрэшты, вопыт у правядзенні такіх мерапрыемстваў у нас усё-такі ёсць. Так, памятаем чэмпіянат свету па хакеі ў 2014 годзе. Не толькі мы, але і міжнародная спартыўная супольнасць. З той задачай, па меркаванні экспертаў, Беларусь справілася на выдатна. І вось - чарговая праверка. Ці гатовыя гасцініцы, рэстараны і кафэ задаволіць імаверны павышаны попыт, асабліва ўздоўж буйных рэспубліканскіх аўтадарог. Траса Мінск - Магілёў - няхай і не галоўны транзітны калідор, але адна з самых загружаных у краіне. Дарожнае палатно штодня тэсціруюць каля 20 тысяч аўтамабілістаў. Нашы здымачныя групы з Мінска і Магілёва адправіліся ў невялікае падарожжа і на ўласных колах ацанілі якасць магістралі і прыдарожнай інфраструктуры.
Рэпартаж Аляксандра Лучонка і Андрэя Ястрабава: Гавораць, усе дарогі вядуць у Рым, але ў кантэксце нашай краіны яны вядуць да піраміды. Вось яна, невялікая, у самым цэнтры сталіцы. Будынак - свайго роду наглядны даведнік для аўтатурыстаў і гасцей з-за мяжы. На рэбрах піраміды паказаныя бакі свету і адлегласці да самых буйных гарадоў. Лічыцца, што менавіта нулявы кіламетр - пачатак усіх дарог у Беларусі. Наша здымачная група стартуе менавіта адгэтуль і бярэ курс на ўсход. У няблізкі шлях мы адпраўляемся са спецзаданнем. Аднак пра гэта крыху пазней. Спачатку - пра маршрут. Траса Мінск - Магілёў на атласах пазначаная як М4. Яе працягласць крыху больш за 180 кіламетраў. Магістраль адносіцца да першай тэхнічнай катэгорыі, гэта значыць, мае па дзве паласы ў абодвух кірунках. Кожны дзень дарожнае палатно тэсціруе каля 20 тысяч машын. У гэты паток укаранілася і наша мабільная група.
Шлях з Магілёва пачынаецца з аркі, якая надала глянец гораду. Наперадзе - амаль 75 кіламетраў да Мінскай вобласці. Даведаемся, наколькі камфортным будзе гэты шлях. Адзначым адразу: трасу аўтамабілісты ўжо назвалі самай хуткаснай ў краіне. Усяго чатыры абмежаванні да стыку рэгіёнаў да 90 км/гадзіну. У астатнім - 120. Але яна і самая кароткая – увогуле ўсяго 2 гадзіны. Што адбілася і на інфраструктуры. І першы ж пункт, дзе можна спыніцца перадыхнуць - вось гэтае кафэ. Будаваліся доўга. Адкрыліся паўтара года назад. Разлічвалі на ажыятаж. Замахнуліся на стварэнне гасцінічнага комплексу. Але пакуль ніяк не могуць вырашыць зямельнае пытанне з гарвыканкамам.
Сяргей Хвашчэўскі, дырэктар рэстарана: "Жадалася б, каб больш увагі нам надалі мясцовыя ўлады. Мы сутыкаемся з праблемамі, якія самастойна вырашыць не можам. Нашы мінскія госці, якія едуць з боку Мінска, да нас не могуць патрапіць. Ім трэба зрабіць круг каля 5 кіламетраў да кальцавой. У нас няма тут развязкі. Мы будуем гасцінічны комплекс - сёлета, можа быць, пачнём. Жадалася б даведацца, ці існуюць нейкія праграмы дапамогі?".
Першы пункт для камфортнага прывалу - станцыя аўтазапраўкі - таксама праз тры кіламетры. Адна з самых буйных ва ўсходнім кірунку. Паўтары тысячы падарожнікаў кожны дзень тут не толькі запраўляюць свае аўтамабілі, але і папаўняюць запасы жыццёвага паліва.
Наяўнасць прыбіральняў, пункта харчавання і стаянкі – гэта правіла для ўсіх АЗС. А вось разнастайнасць сэрвісу - ініцыятыва саміх прыватных кампаній. Тут жа сустракаем спадарожніка. Аляксандр Бойка па дарозе ў радзільны дом да жонкі наводзіць так званы мужчынскі марафет. Паводле норм, да Магілёва і ў зваротным кірунку павінна быць 8 заправак. На адлегласці не больш за 50 кіламетраў адна ад адной. Столькі мы і налічылі. У цэлым - еўрапейскі стандарт вытрыманы.
Едзем далей, як кажуць, з ветрыкам. На шляху ў Мінск - толькі адзін гарадок - Бялынічы. Але траса яго абыходзіць. Славутасцяў уздоўж трас ніякіх. Як і паказальнікаў аб іх існаванні. Адзінае, што можа парадаваць – прыгажосць ўраджаю, які спее, і помнікі, які ўсталяваў легендарны калгас "Радзіма". Першая АЗС у кірунку Магілёў - Мінск - праз пяць кіламетраў. Тут нядрэнна развіта сфера паслуг, аднак шматлікія вадзіцелі гавораць, што яшчэ ёсць над чым працаваць. Меркаванні вадзіцеляў разышліся. Напрыклад, ва уладальніка байка Дзмітрыя прэтэнзій няма.
Па першых уражаннях траса досыць гладкая. Тут усё створана для камфортнага пераезду аўтамабілістаў. Уначы яны арыентуюцца па вось такіх святлоадбівальных элементах. Тут, што не можа не радаваць, ёсць спецыяльныя агароджы, якія засцерагаюць ад шуму жыхароў населеных пунктаў. Пэўна гэты ўчастак дарогі можна назваць яшчэ і аэрадромным. Пакрыццё здольна вытрымаць не толькі гэтага малога, але і шматтонныя самалёты або верталёты, пры гэтым ажыццяўляць любыя манеўры. Гэта даказвалі не раз на ваенных вучэннях. Па-баявому гэты выклік прыняло і дарожнае палатно. Асфальт, вядома, у практычным сэнсе не такі даўгавечны як бетон. Але ям і прабоін у гэтым месцы вадзіцелі не заўважылі. Сусветны трэнд - рух на даверы. Аплату з цяжкагрузаў, камерцыйнага транспарту і замежных аўто спаганяе электронная сістэма. Праўда, ёсць свае нюансы. Сапраўды, электронны пункт аплаты за дарогі мы ўбачылі толькі на пад'ездзе да Беразіно. Гэта літаральна за некалькі кіламетраў ад стыку рэгіёнаў.
І толькі бліжэй да мяжы абласцей - першы дарожны знак, што праз 11 км можна будзе не толькі заправіцца, але і паесці, і адпачыць. І толькі тут, праз сем дзясяткаў кіламетраў, - сапраўдны аазіс. І кафэ са столікамі і кухняй, і душавая на запраўцы, і пеленальны столік для мам з дзецьмі. І нават матэль працуе, дарэчы, кругласутачна. І навінка - электразапраўка для экатранспарту. Бясплатная. Па абодва бакі трасы - па адной такой АЗС. Мы ўжо праехалі амаль сотню кіламетраў. І толькі зараз уздоўж трасы з'явілася ахоўная сетка, вадзіцелі дзеляцца, насельнікі лесу на вочы трапляюцца куды часцей. Ёсць дзве рэчы, якія мацней за ўсё прыцягваюць жывёл да дарогі. Гэта шум і салёны асфальт. Для бяспекі ўстанаўліваюць спецыяльную ахоўную сетку. Аднак на трасе Мінск - Магілёў яна абсталяваная толькі ў некалькіх месцах.
Да мяжы рэгіёнаў магілёўская здымачная група дабралася першай. Шлях даўжынёй 70 кіламетраў прайшоў неўзаметку. Якасць трасы М4, у прынцыпе, як і асноўных магістраляў Беларусі, цалкам адпавядае запытам аўтааматараў. І гэта зразумела, ужо зусім хутка наша краіна прыме вялікі спартыўны форум. Білеты на ІІ Еўрапейскія гульні ўжо купляюць у 50 краінах свету. Чакаецца, што 30 тысяч турыстаў стануць гледачамі маштабнага свята. Замежнікі змогуць ацаніць не толькі інфраструктуру, сэрвіс і якасць дарог, але і сапраўдную беларускую гасціннасць.
