Галоўны прынцып, па якім будуецца дзяржаўная работа па падтрымцы найбольш уразлівых катэгорый, заключаецца ў тым, каб дапамога паступала напрамую тым, хто ў ёй сапраўды мае патрэбу. Гэты механізм за гады адладжаны, але часам сустракаюцца сітуацыі, якія патрабуюць індывідуальнага падыходу. З імі беларусы звярталіся да ўладаў, тэлефанавалі на прамыя лініі. Так, гэтыя выпадкі адзінкавыя, але гэта зусім не значыць, што на іх не трэба зважаць. Таму спатрэбіўся шэраг дапаўненняў і змяненняў у дзеючае заканадаўства. Указ Прэзідэнта "Аб сацыяльнай падтрымцы асобных катэгорый грамадзян" якраз і накіраваны на ўдасканаленне падыходаў па сацыяльнай адраснай дапамозе. Дазваляе павысіць пенсіённыя гарантыі і дае шанц на паўнавартасную сям'ю. Больш падрабязна пра навацыі раскажа Вераніка Бута.
Аня, Оля, Алёна і Ваня: для Яўгеніі Казловіч дзеці - галоўнае багацце. У дэкрэтным водпуску яна правяла дзесяць самых шчаслівых гадоў у сваім жыцці. Калі новыя знаёмыя пыталіся аб месцы працы, жартам адказвала: "Працую мамай". Затым працавала галоўным бухгалтарам. Але калі настаў час ісці на заслужаны адпачынак, высветлілася: можа разлічваць толькі на сацыяльную пенсію. Да працоўнай не хапіла ўсяго два гады. Прызнаецца: крыўдна да слёз, бо без справы не сядзела ўсё жыццё.
Для шматдзетных маці пералічаць стаж
Зараз шматдзетныя мамы, у якіх чацвёра дзяцей і яны старэйшыя за 8 гадоў, змогуць разлічваць не толькі на падзяку сваёй сям'і, але і дзяржавы. Падпісаны сёння Прэзідэнтам указ дазваляе скараціць страхавы стаж для працоўнай пенсіі (гэта значыць час, калі былі выплаты ў Фонд сацабароны) да 10 гадоў.
Агульны стаж не менш за 20 гадоў
Страхавы стаж не менш за 10 гадоў
Для астатніх жа катэгорый гэты тэрмін ужо амаль 18 гадоў, а да канца наступнай пяцігодкі будзе і зусім 20. Акрамя гэтага, у агульным стажы ўлічаць не 9, а 12 гадоў дэкрэту.
У Беларусі вось ужо 8 гадоў дзейнічае сістэма адраснай дапамогі
Ёсць людзі, якім неабходныя асаблівая ўвага і падтрымка дзяржавы. Для іх у Беларусі вось ужо 8 гадоў дзейнічае сістэма адраснай дапамогі. Жыццёвыя акалічнасці паказалі: уразлівыя катэгорыі ў краіне яшчэ засталіся. Так, іх няшмат, выпадкі хутчэй адзінкавыя, але кожны з іх з жыцця. І тут хутчэй патрэбны індывідуальны падыход да кожнай такой сям'і. Гэты прынцып Міністэрства працы ўзяло за аснову пры падрыхтоўцы праекта ўказа аб сацыяльнай падтрымцы асобных катэгорый грамадзян.Дэталёвая размова, як зрабіць дапамогу адраснай і яшчэ больш эфектыўнай, адбылася на мінулым тыдні ў Палацы Незалежнасці. Прэзідэнт прынцыпова падтрымаў рашэнне аказаць дапамогу найбольш уразлівым і папрасіў улічыць некаторыя заўвагі. Пасля дапрацоўкі праект указа сёння быў афіцыйна прыняты. Размова аб трох напрамках: гэта пенсіённы стаж, медыцынская дапамога і сацабарона.
У сярэднім па адрасную дапамогу сёння звяртаецца каля 8 тысяч шматдзетных сем'яў
Па прыкладных разліках Мінпрацы, фінансавае плячо дзяржава падставіць яшчэ 6 тысячам сем'яў. А гэта прыкладна 35 тысяч беларусаў, бо даплаты фарміруюцца з разліку на кожнага члена сям'і. З 1 верасня гэтага года зменіцца штомесячная адрасная дапамога малазабяспечаным шматдзетным сем'ям. І тэрміны выплат: зараз гэтыя дапамогі можна будзе атрымліваць на працягу года (а не 6 месяцаў).
Для некаторых беларусак запаветная мара пачуць смех дзіцяці (хаця б аднаго, але свайго, роднага) аказалася пад пагрозай. Сёння ЭКА - адзін з найбольш эфектыўных метадаў пераадолення бясплоднасці. Толькі летась дзякуючы працы беларускіх медыкаў з'явілася больш за тысячу немаўлят. У краіне для гэтых мэтаў ёсць ільготнае крэдытаванне. Але, на жаль, сродкаў, каб прагучала запаветнае "Віншую, вы хутка станеце мамай!", хапае не ўсім. Новы ўказ дае жанчынам такі шанц - у яго ўключана адна бясплатная спроба ЭКА. Згодна з ацэнкамі спецыялістаў, дакумент дазволіць ашчаслівіць многіх.
Дапамогу акажуць адрасна: жанчынам да 40 гадоў і калі на гэта ёсць медыцынскія паказанні. Шанц стаць шчаслівымі бацькамі штогод выкарыстоўваюць каля 5 тысяч сем'яў. Жанна і Рыгор Баранчук сёлета адсвяткуюць сваё чарговае вясельнае дзесяцігоддзе. За гэты перыяд разлучыць сям'ю не здолелі нават, здавалася б, самыя складаныя жыццёвыя нягоды. З траіх дзяцей двое са складаным лёсам: Аляксей і Таццяна, абодвум па 28 гадоў. Урачы гавораць, што вылечыць такую форму ДЦП немагчыма. Але сям'я верыць: усе праблемы можна пераадолець разам. З сакавіка 1994 года па лістапад 2009 Жанна даглядала сваіх непаўналетніх дзяцей. Калі яны выраслі, аформіла догляд інвалідаў першай групы. Сёння ў жанчыны агульны стаж па апецы ўжо перавышае 20 гадоў. А значыць папраўкі, прынятыя сёння Прэзідэнтам, даюць ёй магчымасць атрымліваць заслужаную пенсію.
Беларусам, хто з інваліднасцю першай ці другой групы жыве ўжо 10 гадоў і больш, знізяць страхавы стаж. Тэрміны будуць індывідуальныя. За кожны поўны год з абмежаваннямі па здароўі мінус 6 месяцаў. Калі на інваліднасці вымушаныя быць больш чым 21 год - стаж скароцяць на 5 гадоў. Змяняюцца патрабаванні і да агульнага стажу. Плюс інвалідам з дзяцінства, каму групу па здароўі далі на ўсё жыццё, павялічаць пенсію па ўзросце. Згодна з новым указам, працоўную пенсію налічаць дэкрэтнікам у выпадку страты кармільца.
