Раней тут планавалі ўзвесці некалькі шматпавярховых дамоў. Але такія перспектывы не падтрымалі мясцовыя жыхары. Новы праект прадугледжвае рэканструкцыю старога будынка пад філіял 75-й гімназіі, а састарэлыя гаражы заменяць спартыўныя пляцоўкі. Але найбольш гарачыя спрэчкі выклікала ідэя будаўніцтва падземнага паркінга. Як зменіцца тэрыторыя за парадным уваходам сталіцы, раскажа Ян Пашкевіч.
Тады будаўнічага буму ў двары па вуліцы Свярдлова ўдалося пазбегнуць. Новыя будынкі не толькі б перанасялілі двор, але і змянілі архітэктурны выгляд - пляцоўка знаходзіцца адразу за брамай Мінска. Вырашыць праблему ўзяліся ў мэрыі.
Ніякага будаўніцтва, толькі добраўпарадкаванне - такую канцэпцыю атрымаў новы праект двара. Старыя гаражы плануюць знесці, а двухпавярховы будынак былога дзіцячага сада цалкам аднавіць.
У адноўленым будынку з'явіцца пачатковая школа 75-й гімназіі. Тут плануюць праводзіць не толькі заняткі для васьмі дадатковых класаў, але і размесцяць мастацкія студыі.
Побач жа з пачатковай школай размесцяцца спартыўныя пляцоўкі - фітнес у фармаце опен-эйр будуць асвойваць і школьнікі, і мясцовыя жыхары.
Сёння ж спартыўная пляцоўка побач з гімназіяй выглядае вось так - бетоннае поле для баскетбола і некалькі турнікоў.
Месца ж для міні-стадыёна з'явіцца пасля зносу старых гаражоў.
Гістарычнай славутасцю гэтыя гаражы не назавеш, але трапіць у аб'ектыў камеры турыста яны ўсё ж такі могуць - двор знаходзіцца за некалькі дзясяткаў метраў ад чыгуначнага вакзала.
Паркоўку ж плануюць апусціць на некалькі метраў пад зямлю - паркінг будзе разлічаны на 120 месцаў. Але, на думку мясцовых жыхароў, у такім выпадку дыхаць у двары не будзе чым, павісне смог ад машынных выхлапаў.
Унесці ж свае прапановы па абнаўленні параднага ўваходу ў беларускую сталіцу ўсе зацікаўленыя жыхары могуць да 20-га ліпеня - тады завершыцца грамадскае абмеркаванне праекта. Потым план дапрацуюць з улікам пажаданняў.