Адкрыты пасля рэканструкцыі. Сёння на мосце цераз Свіслач на Машэрава ў сталіцы поўнасцю аднавілі рух - транспарт курсіруе па трох палосах у кожны бок, праўда, пакуль без разметкі. Яе гэтай ноччу выканаюць з тэрмапластыку. А пакуль процілеглыя патокі падзелены стойкамі. Цалкам рамонт завершыцца ў пачатку мая. Засталіся работы пад мостам.
Васіль Цібеж, галоўны інжынер ДП "Гардарбуд": "Быў запушчаны рух па ўсіх палосах, па ўсёй шырыні праспекта. У найбліжэйшую ноч мы завершым работы па нанясенні разметкі з тэрмапластыку. Такім чынам, уся схема будзе ў прынцыпе рэалізаваная. Бяспека руху гарантавана, што пацвярджаецца адпаведным абследаваннем".
Падчас рэканструкцыі пашырана і пешаходная зона. Уладкаваны веладарожкі і ўстаноўлены сучасныя ліхтары і лаўкі.
