Сотні ваенных машын і дзясяткі зенітна-ракетных комплексаў у гэтыя дні перакінутыя ў сталіцу. Сёння на Мінск-Арэне адкрываецца Міжнародная выстава ваеннай тэхнікі і ўзбраення Мілекс-2014. Каб паказаць свае найлепшыя ўзоры, у Беларусь прыехалі ваенныя канструктары з усяго свету. Экспазіцыю агледзеў Юрый Шаўчук.
У пошуках свабодных месцаў для паркоўкі буйнагабарытная ваенная тэхніка напярэдадні цэлы дзень кружыла вакол Мінск-Арэны. Такі незвычайны аўтапарк тут сабраўся напярэдадні міжнароднай выставы ўзбраення і ваеннай тэхнікі Мілекс. Экспазіцыя ўжо сёмы год запар дыслакуе ў Мінску сотні ўзораў найлепшай ваеннай тэхнікі з усяго свету.
Ігар Быкаў, намеснік старшыні Дзяржаўнага ваенна-прамысловага камітэта Беларусі: На сённяшні дзень больш за 140 экспанентаў, 23 афіцыйныя дэлегацыі, больш як 80 арганізацый з Рэспублікі Беларусь бяруць удзел. Больш як 400 экспанатаў будуць дэманстравацца беларусамі.
Дзяржваенпрам Беларусі вызначыў чатыры асноўныя кірункі ў стварэнні новых узораў узбраення. Геаінфармацыйныя сістэмы і беспілотнікі, радыёэлектронная разведка і барацьба, стварэнне сродкаў перамяшчэння, а таксама агнявога паражэння. Усе гэтыя экзэмпляры беларускай вытворчасці будуць дэманстравацца ў шырокім асартыменце на Мілекс-2014.
Ігар Быкаў, намеснік старшыні Дзяржаўнага ваенна-прамысловага камітэта Беларусі: Сёлета мы дэманструем і іншую мадэрнізацыю Пячоры, завецца яна Салібарда, прадпрыемства Легпур завяршала працу, правяло пускавыя выпрабаванні. Вось перада мной стаіць комплекс, які ўжо запатрабаваны на знешнім рынку і выраблены пад замежнага заказчыка.
На адкрытай пляцоўцы, акрамя зенітна-ракетных комплексаў, наведвальнікі выставы змогуць убачыць танкі, браніраваныя аўтамабілі і дзясяткі беспілотных лятальных апаратаў. А ў сценах канькабежнага стадыёна ў гэтыя дні замест лядовай пляцоўкі іншы плацдарм. Сотні стэндаў ваенных прадпрыемстваў, узоры тэхнікі і нават гейм-зона. Словам, тут кожны знойдзе сабе занятак па інтарэсах: і тыя, хто ў танкі гуляе на камп'ютары, і тыя, хто іх купляе.
Дзверы міжнародная выстава Мілекс-2014 для ўсіх гасцей расчыніць ужо сёння. На працягу чатырох дзён усіх аматараў ваеннай тэхнікі запрашае Мінск-Арэна. Менавіта тут на адкрытай і закрытай пляцоўках адбудзецца экспазіцыя ўзбраення.
