Шматфункцыянальны спарткомплекс "Чыжоўка-Арэна" менш чым за пару гадоў пасля адкрыцця ператварыўся ў адзін з галоўных брэндаў сталіцы. Ён стаў увасабленнем найноўшых тэхналагічных распрацовак, а ўнікальная арэна паспяхова здала першы вялікі іспыт, якім стаў чэмпіянат свету па хакеі.
"Чыжоўка-Арэна". Арэна-трансформер. Лядовая каробка лёгка можа стаць пляцоўкай для гульнявых відаў спорту або канцэртнай сцэнай.
Будаўніцтва маштабнага лядовага комплексу пачалося ў 2009 годзе. Менавіта тады Беларусь атрымала права правядзення чэмпіянату свету па хакеі. Месца выбралі асаблівае: ландшафтна-рэкрэацыйная зона на беразе Чыжоўскага вадасховішча. Пазней дзякуючы спарткомплексу і планетарнаму форуму змяніўся ўвесь мікрараён.
Адкрыццё "Чыжоўка-Арэны" адбылося 25 снежня 2013 года. За некалькі месяцаў да чэмпіянату свету. Нам было чым здзіўляць знакамітых гасцей. Спецыяльная плавальная бартавая сістэма паляпшае амартызацыю, а значыць, памяншае рызыку траўмы. У Нацыянальнай хакейнай лізе - гэта норма. А вось у Еўропе або Расіі такіх пляцовак адзінкі.
Трыбуны ўяўляюць сабою два ярусы. Тут з камфортам размяшчаюцца дзевяць тысяч чалавек. А дзякуючы блітчарам (тэлескапічным рассоўным трыбунам) ёмістасць павялічваецца да 10 тысяч. 13 раздзявалак для розных узроставых катэгорый, з іх дзве - галоўныя, маюць прамы выхад да лёду. Усё гэта ў маі 2014-га ацанілі лепшыя хакеісты планеты.
Падчас чэмпіянату свету на "Чыжоўка-Арэне" гулялі каманды групы А. Чэхія, Славакія, Швецыя і Канада. Каб правесці чвэрцьфінальны паядынак, сюды прыехалі яшчэ і фіны. То была сапраўдная зорная гадзіна для толькі пабудаванай арэны.
Беларусь будзе падаваць заяўку на яшчэ адзін чэмпіянат, але гэта аддаленая перспектыва. Ужо вядома: менавіта ў Чыжоўцы ў наступным годзе пройдзе моладзевае першынство планеты па хакеі.
Маштаб арэны шакуе. Агульная плошча амаль 70 тысяч квадратных метраў. З іх: вялікая арэна - 39 тысяч, малая - 19 з паловай, і больш як 9 тысяч займае ўстаўка - злучальная частка дзвюх арэн, зона вольнага часу і забаў.
Спаборніцтвы па гандболе, валейболе, гімнастыцы, боксе і барацьбе. Па сутнасці, сюды можна адаптаваць амаль любыя віды. Для аматараў, акрамя масавага катання, тут даступныя: вялізная трэнажорная зала, дзве фітнес-залы і гульнявая зала. Усё гэта карыстаецца попытам у мясцовых жыхароў.
Усё, што адбываецца на аб'екце, кантралюецца адгэтуль. Аб любых непаладках першымі даведваюцца менавіта ў дыспетчарскай. Таксама тут ёсць доступ да ўсіх 280 камер відэаназірання.
А гэта сэрца "Чыжоўка-Арэны". Усё роўна, на вуліцы плюс 30 або мінус 30. Тэмпература на лядовай пляцоўцы пастаянная. Усё дзякуючы сучаснаму кампрэсарнаму абсталяванню. Тэмпература лёду мінус 9-10 градусаў. Паветра - плюс 16.