Падчас зімовых уік-эндаў адным з самых папулярных месцаў адпачынку беларусаў і гасцей нашай краіны стаў Музей народнай архітэктуры і побыту ў Строчыцах. Гэта адзінае месца, дзе экспанаты размяшчаюцца пад адкрытым небам. Расказвае Наталля Бардзілоўская.
Беларусь у мініяцюры. На 150-ці гектарах пад Мінскам размясціліся Падняпроўе, Паазер'е, цэнтральная Беларусь. Вось-вось унікальную экспазіцыю папоўняць помнікі драўлянага дойлідства і аўтэнтычныя рэчы Панямоння, заходняга і ўсходняга Палесся. Будынкі, узрост якіх стагоддзі, звозілі з усёй краіны, каб зберагчы. 35 узораў. Прычым, не проста паставілі хаты, млыны і цэрквы на новую зямлю – кожны рэгіён аздобілі характэрным ландшафтам і раслінамі: сасновыя зараснікі Паазерья, больш лугоў - Падняпроўе.
Тут знаёмяць не толькі з аўтэнтыкай, у Музеі народнай архітэктуры і побыту архаіку спалучаюць з сучаснасцю. Так, хочаце ўзгадаць транспартны сродак нашых бабуль і дзядуль – калі ласка, вас пракоцяць на кані. Хочаце узняцца да нябёсаў – тут ёсць свой міні-аэрадром і дэльтаплан. Нават на хвалях можна праплыць на чоўне па водах ракі Пціч. Даследаванне і перадачу сакрэтаў аўтэнтыкі музей увасабляе не толькі праз архітэктуру. У Строчыцах папулярызуюць беларускую кухню. Апроч дранікаў, верашчака, мачанка. А вось рэцэпты народных напояў - медавухі, з журавін, з хрэну - асабліва не раскрываюць.
Строчыцы – акадэмія беларускай фалькларыстыкі. Тут рэканструююць усе народныя святы і запрашаюць на іх усіх, хто жадае. Да Нараджэння Хрыстовага ў музейных Строчыцах каледаванне. Віфлеемская зорка на дрэўцы. Частаванне куццёй. Варажба. Ваджэнне Мядзведзя і Казы.
Зрэшты, сёлета з улікам Усходняга календара ў спісе галоўных калядных персанажаў з'явіўся... Певень! У беларусаў гэта паважаная птушка: адганяла нячыстую сілу сваім крыкам. А яшчэ прадказвала лёс незамужнім дзяўчатам. На парог хаты ставілі міску з вадой, талерку з зернем, клалі люстэрка і запускалі пеўня. Чырвоны ж і паважны строчыцкі певень наваражыў 2017-ы годам яркім, паспяховым, багатым.
