Беларускія медыкі не марнуюць часу ў супрацьстаянні каранавірусу. Міністэрства аховы здароўя запэўнівае: у нашых урачоў ёсць усё неабходнае для своечасовага выяўлення гэтай інфекцыі. А самі ўрачы ў пастаяннай боегатоўнасці і праводзяць вучэнні па прадухіленні распаўсюджвання віруса.
Акрамя таго, у паветранай гавані наладжаны падвойны кантроль. Спецыялісты заходзяць на борт самалёта і правяраюць людзей на наяўнасць сімптомаў віруса, затым у самім аэрапорце пасажыры могуць прайсці лабараторны кантроль, здаўшы экспрэс-тэст.
Што да наземных пунктаў пропуску праз мяжу, то ў 23 з іх працуюць мабільныя медцэнтры, дзе бяруць аналізы ў грамадзян, якія прыбылі з Кітая. Літаральна на днях аздараўленчы цэнтр "Брыганціна" прыняў у сябе амаль тры дзясяткі кітайскіх студэнтаў.
Адзначым, што размова ідзе толькі пра тых грамадзян Кітая, якія не былі ў гарадах, закрытых на каранцін, і ў тых абласцях Паднябеснай, дзе зарэгістраваны выпадкі захворвання. Кітайскія студэнты прабудуць у "Брыганціне" два тыдні з мэтай прафілактыкі і па жаданні сваіх універсітэцкіх калег, якія падчас канікул не выязджалі ў КНР.
Замежныя студэнты будуць знаходзіцца пад наглядам медыкаў, але пры гэтым прадоўжауць навучанне анлайн.
Усяго з канца студзеня санітарны кантроль прайшлі амаль 200 000 чалавек, 500 з іх былі абследаваны на каранавірус. На сёння выпадкаў заражэння ў Беларусі не выяўлена.
Міністэрства аховы здароўя запэўнівае: у нашых урачоў ёсць усё неабходнае для своечасовага выяўлення каранавіруса
9 февраля 2020
