Суткі - ад 12 да 18 рублёў без уліку харчавання. Мінская гасцініца для хатніх жывёл рыхтуецца да наплыву пастаяльцаў.
У той час як уладальнікі жывёл накіруюцца ў іншыя краіны, катам і сабакам тут прапануюць не толькі начлег, але і нават культурна-аздараўленчую праграму. Антаніна Станкевіч даведалася, як бавяць час у гасцініцы незвычайныя кліенты.
Вытанчаная Анастасія - па спецыяльнасці ветэрынарны ўрач. А таму з лёгкасцю знаходзіць агульную мову з пастаяльцамі гасцініцы. Маладая і жвавая аўчарка Нора, здаецца, таксама рада бачыць сваю новую сяброўку: ведае - зараз час гуляць. Дарэчы, такія прагулкі - абавязковы пункт правілаў утрымання жывёл. Як мінімум два разы на дзень сабакам даюць пабегаць на заднім двары. Аднак калі надвор'е добрае, то выведуць на вуліцу тры і чатыры разы.
Зараз у гасцініцы для жывёл на часовым утрыманні два сабакі. Так што догляд і падыход да кожнага выключна індывідуальны. Харчаванне - толькі па рэкамендацыі саміх уладальнікаў. Гадаванцы, хоць, напэўна, і сумуюць па сваіх гаспадарах, але дакладна знаходзяцца пад належнай апекай.
Для жывёл прапаноўваюць і дадатковыя паслугі. Ветэрынарны агляд, стыльная стрыжка - пры неабходнасці на месца выедзе грумер. Але самае карыснае для сабак - кіналагічныя курсы. Таццяна Ботвіч дэманструе: кожны сабака можа выконваць пэўныя каманды, без якіх існаванне ў горадзе вельмі складанае. Галоўнае ў гэтай справе - крыху настойлівасці і часу.
Часовы прытулак тут могуць знайсці не толькі сабакі, але і каты. Для іх - асобнае памяшканне, разлічанае на 36 месцаў. За суткі ўтрымання прыйдзецца аддаць 12 рублёў. Начлег для сабак абыдзецца крыху даражэй: ад 14 да 18 у залежнасці ад вагі жывёліны.
У сярэднім хатнія гадаванцы знаходзяцца ў гасцініцы ад 7 да 10 сутак. Многіх гаспадары пакідалі тут ужо некалькі разоў. З моманту адкрыцця гасцініцы тут часова знаходзіліся 130 сабак і паўсотні катоў.
