Мінск з размахам святкуе Дзень горада

14 Верасня 2019

Мінск напоўнены выдатным настроем. Цікавыя оўпен-эйры, фестывалі, спартыўныя старты. Вуліцы напоўніліся і ровам матораў. Брутальны заезд упрыгожыў гэты дзень - байкеры закрылі свой сезон. Зрэшты, замест слоў лепш адзін раз зірнуць. Атмасферны рэпартаж прама зараз.

Расказвае Аляксандра Кавеліч. У свой дзень нараджэння Мінск адправіўся ў падарожжа па старонках гарадскога і нават сусветнага летапісу. Рэканструктары з дзясятка краін узнавілі ў цэнтры сталіцы атмасферу даўніх эпох.

Ад стаянак часоў палеаліту да бітваў Вялікай Айчыннай. Усе атрыбуты мінулых стагоддзяў выкананыя з гістарычнай дакладнасцю. Напрыклад, зараз мы ў кавальскай майстэрні ранняга Сярэдневякоўя. Са сваёй аўтэнтычнай майстэрняй Дзмітрый Андрэеў падарожнічае па розных гарадах. А сёння ў святочным Мінску расказвае пачаткоўцам асновы кавальскай справы па старажытнай тэхналогіі. І пакуль тут успаміналі падзеі мінулых стагоддзяў, Верхні горад стаў месцам прыцягнення сучаснага мастацтва. Вулічныя артысты ператварылі гарадскія вуліцы ў канцэртныя пляцоўкі. А ля Ратушы, дзе кожны тыдзень знаёмяць гасцей з культурай розных краін, гучалі віншаванні на многіх мовах. Пажаданнямі любімаму гораду дзяліліся і гледачы. Мінчане разам з музыкантамі і акцёрамі падхоплівалі святочны настрой.

Сталічныя вуліцы сёння сталі і мотатрэкам. Роў 8 тысяч матораў раздаваўся за сотні метраў. Байкеры з дзясяткаў краін пранесліся па цэнтральных праспектах, каб ярка завяршыць мотасезон. Дрыфт-шоу і паказальныя выступленні вейкбардыстаў. Самай экстрэмальнай лакацыяй стала тэрыторыя ля Палаца спорту. Маленькія мінчане таксама далучыліся да гарадскіх гонак. Праўда, на бегавелах. На старт ля "Чыжоўка-Арэны" выйшлі амаль сто ўдзельнікаў.

Атмасферна будзе ў Мінску да паўночы. А ўжо заўтра са спартыўным драйвам сталіца прадоўжыць святочны ўік-энд.