Мінск рыхтуецца да Дня Незалежнасці: вайскоўцы традыцыйна рэпеціруюць парад. Горад паступова набывае святочнае афармленне. Каля стэлы ўжо пачалі манціраваць трыбуны для гледачоў. Амаль два месяцы доўжацца трэніроўкі вайскоўцаў. Толькі рота ганаровай варты ўжо трэці раз адпрацоўвае элементы ў цэнтры горада. Тэхніка - а гэта танкі Т-72, баявыя машыны пяхоты і дэсанта, зенітна-ракетныя комплексы "Тор", "Аса", "С-300" - ужо адпрацавала на аэрадроме ў Ліпках. Зараз іх у часцях рыхтуюць да першай генеральнай рэпетыцыі, якая пройдзе ў суботу. А ў гэтыя хвіліны каля стэлы "Мінск - горад-герой" працуе наша здымачная група, Карына Пашкова на сувязі са студыяй.
Мы зараз знаходзімся на праспекце Машэрава. Менавіта тут 3 ліпеня пройдзе парад, прымеркаваны да Дня Незалежнасці Беларусі. А пакуль мы - тэлевізіёншчыкі і вайскоўцы - яшчэ раз акунёмся ў падрыхтоўку да свята. Меней за гадзіну застаецца да рэпетыцыі роты ганаровай варты.
У парадным разліку будзе ўдзельнічаць больш за сотню вайскоўцаў. Апроч рэпетыцый у цэнтры сталіцы, штодня яны адточваюць сваё майстэрства ў часцях. Да галоўнага, мабыць, экзамену ва ўдзельнікаў парада застаюцца ўсяго два тыдні. За гэты час трэба давесці свае рухі ў літаральным сэнсе да аўтаматызму. Чаканіць крок, трымаць строй і постаць іх вучаць кожны дзень, а вось адметнасцю парадаў заўсёды становяцца фігуры пабудоў і захапляльныя элементы. Не абыдзецца без навінак ваенных віртуозаў, але большасць з сюрпрызаў пакуль трымаюцца ў сакрэце.
Сёння да вайскоўцаў падключаюцца і мае калегі - рэжысёрская і аператарская група Белтэлерадыёкампаніі. Вопытным поглядам будуць расстаўлены тэлекамеры і канкрэтныя пункты, дзе карцінка найбольш яркая. Згодна з практыкай, праца ля стэлы пачнецца пасля 10 вечара, дарожная міліцыя перакрые рух. І калона вайскоўцаў пачне выстройвацца ў каробкі. Нагадаю, што першая генеральная рэпетыцыя пройдзе ў суботу. На наступным тыдні адпрацуе элементы вышэйшага пілатажу авіяцыя. Адзначу, што той, хто жадае ўбачыць рэпетыцыю першым, усё яшчэ можа прыехаць сюды, да стэлы "Мінск - горад-герой", да пачатку застаюцца лічаныя хвіліны.
